Sulisartunut aalajangersimasunuinnaq qineqqusaarneq

Inuit Ataqatigiit qineq­qu­saaruteqarnerat sulisartunik inuiaqatigiinnilumi tamani avissaartuutsitsissaaq. Ilaqutariit sulisartut meerartallit nukittorsarneqarnissaannik Inuit Ataqatigiit qineq­qu­saaruteqarnerat sulisartunik inuiaqatigiinnilumi tamani avissaartuutsitsissaaq kammalaatersortutullisooq perorsaasut kisiisa akissarsiatigut qaffanneqarnissaat anguniaramikku, taakku nunatsinni sulerulunnerpaatut qimunnerpaatullu taallugit, naak SIK-mi uagut ilaasortavut suli qimunnerullutillu sulerulunnerugaluartut. 

Ilissi kammalaati­vut meeqqerivinni perorsaasut aajuku akissar­siassasi, ilissili SIK-miut meeqqerivinni suli­sar­tut akissarsissanngilasi! Taava aperisariaqarpu­gut: ilumut siuttoqarusunnerpu­gut partiimik inuiaqatigiinni assigiinngitsilluni ingerlatseriaa­se­qarusuttunik?

SIK-mi isumaqarpugut politikerit imminnut sulisitsisutut inissillutik taamatut sulisartunut aalajangersimasunuinnaq Nunatta Karsianit qaffaasoqarnissaanik qineqqusaarnertik unitsittariaqaraat, tassami ilumoorsinnaanngilaq inuiaqatigiit aningaasaataat inuiaqatigiinni akissarsiatigut assigiinngisitsinissamut, taamalu sulisartunik avissaartuutsitsinermut atorneqassasut.

Perorsaasut aningaasarsiaat kisiisa qaffannerisigut meeqqat ajornartorsiutaat aaqqiivigineqarnavianngillat, meeqqalli atugarisaat kiisalu perorsaasut atugaat pitsanngorsaavigineqassappata ilaasortat ulluinnarni atugaat pitsanngorsaavigineqarluinnartariaqarput.

Puiunngilarput SIK-p siornaak Qassimiuaartitsineranut atatillugu Inuit Ataqatigii siulittaasuat oqariartuuteqarmat SIK malillugu aningaasarsiallit aningaasarsiakippallaarujussuartut. Tamanna puorsimanerpaa, imaluunniit taamanikkut oqarluartaaginnarsimanerpa, ilaatigummi taakkummata immikkuullarissumik perorsaasut aningaasarsiaasa qaffanneqarnissaannik neriorsuisut.

Jess G, Berthelsen
Kattuffiup siulittaasua