Ulluni makkunani sulisartut akissarsiaat sulinerminnilu atugarisaat pillugit SIK-p pisortallu isumaqatigiinniarneri ingerlapput.
Pisortat isumaqatiginninniartitaannit neqeroorutigineqartut kanngunaannartumilluunniit nalilerneqartariaqarput. Ilaasortatta akunnermut agguaqatigiissillugu akissarsiaasa taamaallaat 1,20 kr.-inik qaffaateqarnissat maannamut aalajangiusimavaat.
Illua’tungaatigut piffissami sivitsulersumi mittarfiit tallilerneqarnissaat koruuninik milliardinik arlalinnik akeqartussaq eqqartorneqarpoq.
Taava immaqa ingerlaannaq ima aperisoqassaaq: Tamanna SIK-p pisortallu akissarsiat pillugit isumaqatigiinniarnerannut qanoq ililluni attuumassuteqarami? Akissullu unaassaaq: Inuiaqatigiit aaqqissuussaanerat sulisartullu akissarsiaqartitaanerat imminnut attuumassuteqarluinnarput. Mittarfiimmi sanaartorneqarnerat taama annertutigisoq Kalaallit Nunaanni inuiaqatigiit aaqqissuussaanerannut sunniuteqartorujussuusussaavoq.
Taamaattumik isumaqarpunga Inatsisartut aalajangersaannginnerminni eqqarsarluartariaqartut. Nalunanngilarmi qanorluunniit aalajangertoqassagaluarpat aalajangiussat inuiaqatigiinnut akuuffigisatsinnut pitsaaquteqarlutillu ajoquteqartussaasut nunarput ataatsimut isigissagaanni. Sumiiffiinni aalajangersimasuni iluarusuutaassapput, sumiiffiilli ilaanni pitsaanngitsumik kinguneqassallutik. Tamakkulu aamma SIK-p ilaasortaanit taakkualu ilaqutaannit tuusintilikkaanit malugineqanngitsoornavianngillat.
Taamaattoq SIK isumaqarpoq sulisussaqarniarneq eqqarsaatigalugu, aammalu sapinngisamik sulisartut nunaqavissut annertunerpaamik peqataatinneqassappata, kikkunnut tamanut pitsaanerpaajussasoq mittarfeqarnermi suliassat kittaarlugit ingerlanneqarpata.
Kialluunnimmi takorloorsinnaavaa ataatsikkoorsuaq sananeqassappata avataaniit sulisussanik annertoorujussuarmik tikisitsisariaqassasugut. Taannaannaanngilarli – tamatuma akinut pitsaanngitsumik annertuumik sunniuteqarnissaa naatsorsuutigineqartariaqarpoq sanaartorneq nalinginnaasoq aamma sumiiffinni ingerlanneqassappat. SIK allaat isumaqarpoq mittarfiit kittaarlugit sananeqarunik akikinnerusumik sananeqarsinnaasut.
Taamaalilluni aamma aningaasat amerlanerusut akissarsiat qaffaatissaattut atorneqarsinnaalissagaluarput, tamannami ilaasortavut eqqarsaatigalugit pisariaqarluinnartutut isigigaara. Taamaattumik Inatsisartut matumuuna eqqarsarluaqquavut, inuiaqatigiit aningaasaqarnerat aammattaaq eqqarsaatigalugu.
Taamaattumik inassutigeqqissavarput manna: Mittarfissat kittaarlugit sananeqarlik. Ameerikkarmiut aningaasaleeqataaniarlutik neqeroorutaat aamma akorluartariaqarpoq iluatigalugulu, tamanna immaqa aamma Kangerlussuup mittarfittut ataannarnissaanut iluaqutaasinnaammat.
Naggataatigut erseqqissassavara Naalakkersuisut siulittaasuata aningaasanik taama amerlatigisunik suliniutinut angerlaassinera SIK-p nersorneqartariaqartutut isigimmagu.
Inussiarnersumik
Jess G. Berthelsen
SIK-p siulittaasua