Nunani tamalaani sulisartut ulluanni SIK pisarnertut ilaasortami ilaannut marlunnut kajumissaatinik nersornaasiivoq, taamatullu aamma ”Immikkoortortaqarfitsialammik” toqqaalluni.
Helga Iversen, Ilulissat, aamma Maren Therkildsen, Aasiaat, tamarmik immikkut Ôdâq Olsenip Aningaasaateqarfianit nersornaaserneqarput allagartanik 5.000 kr.-inik aningaasartalinnik.
Ôdâq Olsenip Aningaasaateqarfia SIK-p siulersuisuunerinik siulersuisoqartoq ukiut tamaasa sivisuumik ilaasortaasimasunut assigiinngitsutigut sulisartoqatiminnut annertoqqutaalluarsimasunut nersornaatinik kajumissaasiisarpoq. Aningaasaateqarfiup ateqaatigaa angut Kalaallit Nunaanni sulisartut peqatigiiffeqarnerata oqaluttuarisaanerani malunnaateqarluartoq, sulisartorpalaartumik isumaginnilluarnissamik pingaartitsilluni aqqutissiuisimasoq.
Nersornaatisisut marluusut
Ôdâq Olsenip Aningaasaateqarfianit nersornaatisisut tamarmik ilisarnaatigaat ukiorpassuarni suleqatiminnut kajumissaarisuulluarsimanertik sulisartullu peqatigiiffeqarnerannut tapersersuilluarsimanertik.
Maren Therkildsen (Maalaaraq) tassaavoq sulisut sinniisaat misilittagartooq Aasianni najugalik. Suliamini aalajaatsuuvoq suliffimminullu ataqqinnilluni, aammalu ASIP-imi, SIK-p immikkoortortaani, suleqataalluartuulluni.
Maren Therkildsenip sulisut sinniisaattut suleqatiminik kajumissaarisuulluarnini malunnaatigaa.
Helga Iversen sulisartut peqatigiiffiannut ilaasortanngorpoq 1972-imi Qasigiannguani meeqqerivimmi sulileramili. 2000-imilu Ilulissanut nuukkami sulisartut peqatigiiffeqarneranni suleqataanerminik aallussiinnarpoq.
Helga ilinniarsimanngikkaluarluni pikkorissarnernut assigiinngitsunut peqataasarnermigut periarfissanik atorluaaniartarsimavoq, pissarsianilu suleqatiminut sullitaminullu ingerlateqqinniartarlugit.
Immikkoortortaqarfitsialak
SIK-p Nakkutilliisoqarfiata 19. apriili 2018 ataatsimiinnerani, Ôdâq Olsenip Aningaasaateqarfianit nersornaatisisussat nalunaarutigineqarfianni, aamma ”2018-imi Immikkoortortaqarfitsialak”-mik toqqaaneq tusarliunneqarpoq.
Kattuffiup immikkoortortaqarfii marluk taamatut nersornaasigassatut siunnersuutigineqarsimapput. Tassa SIP-Uummannaq aamma SIP-Ilulissat. Nalilersuereerlutik SIK-p siulersuisuunerisa SIP-Ilulissat toqqarpaat 5.000 kr.-inik takussutissillugu – taamalu aappassaanik ”Immikkoortortaqarfitsialammik” taaneqalerput.
Nakkutilliisoqarfiup ataatsimiinnerani Ilulissani SIP-p siulittaasua Else Jonna Villadsen toqqarneqarnerminnut qujassuteqarpoq, oqaatigalugu taamatut taaneqarnissamut naleqquttuujumallutik sulissuteqarsimallutik – sulilu sulissuteqarlutik.
– Ilaasortanik sullissilluarniarpugut. Saaffiginnittut tamarmik ajunngitsumik sullinneqassapput. Immikkoortortaqarfiup allaffia saaffiginnittunut iserfigiuminartuussaaq. Saaffiginnittut sulisartut peqatigiiffiannut ilaasortaanerup iluaqutissartaanik oqaluttuunneqartarput. Illoqarfimmi sulisut sinniisaannut 41-nut suliffeqarfinnullu attaveqarluarniarpugut, minnerunngitsumillu kattuffiup allattoqarfianut attaveqarluarniarluta. SIK-p immikkoortortaqarfii allat misilittakkatsinnik avitseqatigerusuppavut, aammalumi allat misilittagaat isumassarsiorfigerusullutigit, Else Jonna Villadsen oqarpoq.
Ilaasortat amerliartorput
SIP-Ilulissat ullumi 603-nik ilaasortaqartoq ilaasortaqarnerulersimanerminik aammattaaq unnersiutissaqarpoq. Ukiut ataatsip ingerlanerani ilaasortat 64-inik amerlisimapput.
Aammami sulinermik inuussutissarsiuteqartut kattuffiat SIK ataatsimut isigalugu ukiuni kingullerpaani ilaasortaqarneruleriartorsimavoq.
Nakkutilliisoqarfiup ataatsimiinnerani kattuffiup siulittaasuata Jess G. Berthelsenip oqaatigaa ukiup kingulliup ingerlanerani nuna tamakkerlugu ilaasortat ukioq kaajallallugu akiliisartut 209-nik amerlisimasut.
– Taamaattumik suliassaqarfinni uagutsinnut attuumassuteqartuni ilaasortaqarniarnerput ajoriinnagassaanngilaq nunanilu avannarlerni sulisartut kattuffiisa ilaasortaqassusiannut naapertuulluni, Jess G. Berthelsen SIK-p Nakkutilliisoqarfiata ataatsimiinnerani taama ilisimatitsivoq.