Emilia Jonathansen, Tasiilaq, Bolethe B. Enoksen, Qaqortoq, aamma Jens Kristian Kâjangmat, Nuuk, 2022-mi ”Sulisunut sinniisutsialattut” toqqagaapput.
Taamatut nersornaasigaanerannut uppernarsaatissaattut tamarmik immikkut tunineqarput allagartamik diplomimik, 3.000 kr.-inik aningaasartalimmik.
Diplomit kattuffiup siulittaasuanit Jess G. Berthelsenimit aamma siulittaasup tullianit Jokum Zeebimit atsiugaapput, ima oqaasertaqarlutik:
”Diplomi una tunniunneqarpoq sulisut sinniisaattut sulilluartumut, sulisut sulisitsisullu suleqatigiilluarnissaannik pingaartitsisumut, SIK-mut ilaasortaanerup iluaqutissartai pillugit suliniuteqarluartumut kiisalu suleqatit isumaqatigiissutit tunngavigalugit pisinnaatitaaffiisa il.il. ataqqineqarnissaannik suliniuteqarluartumut.”
SIK 2020-mili sinerissami sulisartut peqatigiiffii suleqatigalugit sulisut sinniisaannik taamatut toqqaasitsiniartarsimavoq – tamatumani siunertat pingaarnersaralugu suliffinni sulisunut sinniisaanerup pingaaruteqassusiata erseqqissarneqarnissaa. Misilittakkammi takutippaat suliffimmi sulisut sinniisoqaraangata suleqatigiilluartoqarnerusartoq.
Taamaalilluni pingajussaanik taamatut sulisut sinniisaannik toqqaasoqarpoq. Aaqqissuussinerlu ilassilluarneqarpoq. Sulisut sinniisaat katillugit 21-t illoqarfinnit nunaqarfinnillu assigiinngitsuneersut toqqallaqullugit innersuunneqarsimapput (siunnersuutigineqarsimapput).
Innersuussinerit sumiiffiit ilaanni peqataaffigineqarluavipput – sulisut sinniisaasa ilumut nersualaarneqartariaqavillutillu qiimmassaaserneqartariaqavissut ilaasa sinniisutsialattut toqqarneqarnissaannik siunnersuuteqarnermi tapersersuisut atsiorneri 70-init ikinnerunngitsut katersorneqarsimapput. Tassalu SIK-p siulersuisuunerisa qaammammi uani decembarimi ukioq manna ataatsimiinnerminni kingullermi taakkua ilaat pingasut toqqarpaat kattuffiup allattoqarfiata innersuussuteqarnera tunngavigalugu.
Taakku pingasut qanormitaava oqaatigineqarpat? Toqqarneqarnissaannik siunnersuutini tunngavilersuutit ima tigulaariffigaavut:
Emilia Jonathansen –
Tasiilami Qanganitsad Iddivanni (utoqqaat illuanni) sulisut sinniisaat:
Suliffimmini ulapittaraluarluni suleqatit ikioqqusut piffissaqarfigisarpai oqaloqatigalugit siunnersorlugillu. Suleqatini kattuffeqarnermut tunngasunik malinnaatittuarpai, soorlu SIK-mit nutaarsiassaqartillugu nalunaaruteqartarluni. Sulisut ataatsimiinnerini eqqaasitsissuteqartarpoq suut eqqaamassallugit pingaaruteqarnersut.
Bolethe B. Enoksen – Qaqortumi plejehjemmimi Ajarsivasimmi sulisut sinniisaat:
Suliffimmi pissutsinik aaqqitassaqartillugu tunuarsimaarnani ersarissuliorluni suleriuseqartarpoq. Sulisut sinniisaattut nutartertuartuuvoq. Pikkorissarnerni ataatsimiinnernilu ilisimalikkaminik sinniisoqatiminut saqqummiisarpoq atorluarneqarsinnaasunik – minnerunngitsumillu: Nuannaarneq qiimanerlu ilisarnaatigai suliffimmi sulisullu sinniisaasa akornanni.
Asseq: Qaqortumi sulisartut peqatigiiffiata siulittaasuata Jacob G-Motzfeldtip Bolethe sinniisutsialattut toqqagaaneranut uppernarsaammik tunigaa.
Video: Nuummi SIK-p immikkoortortaata siulittaasuata Josef Therkildsenip aamma SIK-mi siunnersortip Inge-Marie Rosingip Jens Kristian suliffianut ornikkaat sulisut sinniisutsialaattut allagartassaanik tuniartorlugu.
Jens Kristian Kâjangmat – Nuummi Nukissiorfinni sulisut sinniisaat:
Sulisunut tamanut oqaloqatiginninnissamut ammasuuvoq tusarnaartuullunilu. Ajornartorsiutaalersinnaasut eqqumaffigisarpai tamakkulu iliuuseqarfiginiartarlugit. Eqqartueqatiginnissutigisartagai ilaatigut makkuusarput: Tunngaviusumi akissarsiat qanoq aaqqissugaanerat, soraarnerussutisiassanik SISA-mut akilersuisarnermut tunngasut sulinngiffeqartarnermullu tunngasut.