SIK ”Sulisunut Sinniisutsialannik” toqqaavoq

Nunatsinni suliffinni assigiinngitsuni sulisut sinniisorpassuisa ilaat pingasut SIK-p siuler­sui­suu­nerisa ukioq manna ”Sulisunut Sinniisutsialattut” toqqarpaat. Tamanna pivoq kattuffiup iluani susassaqartut kikkulluunniit tamatumunnga siunnersuuteqaqqullugit kajumissaarneqareernerisigut. Tamatumanilu sulisut sinniisaattut inissisimanerup pi­ngaaruteqassusiata ukkatarineqarnissaa siunertarpiaavoq.

Siunnersuutigineqartut ilaat uku taamaalillutik ”Sulisunut Sinniisutsialak”-mik taallugit toqqarneqarput:

1. Serie Sørensen, Nuuk – Namminersorlutik Oqartussani Aningaasaqarnermut Sulisoqarnermullu Aqutsisoqarfimmi sulisut sinniisaat 

Tunngavilersuut: Sulisut sinniisaattut eqeersimaartuuvoq suleqatigiilluarnissamik siuarsaaqataalluni suleqatimilu pisinnaatitaaffisa ataqqineqarnissaannik sulissu­te­qarluni. Aamma SIK-mut ilaasortaanerup iluaqutissartai pillugit paasissutisseeqa­taa­niartarpoq.

2. Haldora T. Jeremiassen, Ilulissat – Avannaata Kommuniani sulisut sinniisaat

Tunngavilersuut: Sulisut sinniisaat eqeersimaartoq suleqatigiilluarnissaq pineqartillugu tunuarsimaanngitsoq aammalu sulisut pisinnaatitaaffiisa ataqqineqarnissaannik pingaartitsisoq. Kattuffimmullu ilaasortanngornissamik kajumissaarisarpoq.

3. Daniel Egede, Maniitsoq – Permagreen-imi sulisut sinniisaat

Tunngavilersuut: Suleqatiminut paasissutissiilluarniartartoq taamalu aamma sule­qatimi pisinnaatitaaffiiisa ataqqineqarnissaannik sulissutiginnittartoq. Nutaanik ilaasortassarsiornissaq pineqartillugu aamma tunuarsimaarneq ajorpoq.

Toqqar­ne­qartut tamarmik immikkut diplominnatsinneqarput 3.000 kr.-inik aningaasartaqartunik (akileraarut peereerlugu).

SIK 2020-mi periaaseq taanna atorlugu sulisut sinniisaasa suliffinni pissutsit pitsaasuunissaannut pingaaruteqarnerannik immikkut ittumik nittarsaassinialerpoq, tassa sulisut akor­nanni suleqatigiinnerup minnerunngitsumillu sulisitsisunik suleqateqarnerup siuarsarnissaa eqqarsaatigalugu.

Taakkorpiaapput pingaartinneqartut ukioq manna sulisut sinniisutsialaannik toqqaaniarnermi. Taakkuinnaanngillalli pingaartinneqartut. Aamma sulisartut kattuffiannut SIK-mut ilaasortaanerup iluaqutissartaasa ilisimaneqarnissaannik pingaartitsineq suliffimmilu suleqatit isumaqatigiissutit tunngavigalugit pisinnaatitaaffiisa eqqumaffigineqarnissaannik pingaartitsineq toqqaaniarnermi maluginiarneqarput.

Nunatsinni tamarmi suliffinni SIK-p isumaqatigiissutai malillugit sulisuusut sinniisaattut qinikkat ullumi 355-iupput.

Serie Sørensen, Nuuk (NSIP-p siulittaasua Josef Therkildsen ilagalugu).

Haldora T. Jeremiassen, Ilulissat.

Daniel Egede, Maniitsoq (Maniitsumi SIP-p siulittaasuata Elisabeth L. Hansenip tunigaa).