Grethe Fleischer, Uummannaq, aamma Nikolaj Søholm, Aasiaat, 2023-mi sulisut sinniisutsialaattut toqqarneqarput. Maannalu sulisartut peqatigiiffii allaffigineqaqqammerput 2024-mi kikkut taamatuttaaq ataqqinaaserneqassanersut siunnersuuteqaqqullugit.
Sulisut sinniisaattut sulinerup pingaaruteqassusiata maluginiarneqarnissaa taamaalilluni SIK-p kissaatigaa.
Peqatigiiffinnut allakkami taaneqarpoq sulisunut sinniisutsialannik pingasunik toqqaasoqarsinnaasoq, SIK-milu siulersuisuunerit aalajangissagaat kikkut toqqarneqassanersut. Toqqarneqartut tamarmik immikkut diplominnatsinneqassapput 3.000 kr.-inik aningaasartaqartinneqartunik (akileraarut peereerlugu).
Siulersuisuunerit toqqaaniarnerminni makku pingaartissavaat:
- Sulisut sinniisaattut eqeersimaartoq, sulisut sulisitsisullu akornanni suleqatigiinnermik siuarsaaqataasoq,
- SIK-mi ilaasortaanerup iluaqutissartai pillugit paasissutissiisartoq, aammalu
- Suliffimmi suleqatit isumaqatigiissutit tunngavigalugit pisinnaatitaaffiisa il. il. suliffeqarfimmi ataqqineqarnissaannik suliniuteqartartoq.
Siunnersuuteqarnissaq kingusinnerpaamik pissaaq tallimanngorneq 8. novembari 2024. Siunnersuut uunga nassiuteqquneqarpoq: QIA@sik.gl
Peqatigiiffik qinnuigineqarpoq siunnersuummik nassiussinerminni makku nalunaarutigeqqullugit:
- Sulisut sinniisaata siunnersuutigineqartup aqqa.
- Sulisut sinniisaata sumi sulisuunera.
- Inuup pineqartup ”2024-mi Sulisunut Sinniisutsialak”-tut toqqarneqartariaqarneranut tunngavilersuut.