”Sulisut sinniisaannut”, taama qulequtaqarpoq SIK-mit naqitaaraq nutaaq. Tassaavorlu sulisut sinniisaattut qinikkanut allagaq paasissutissanik, siunnersuutinik kajumissaarutinillu imalik.
Sammisaq ”sulisut sinniisaasa pingaarutaat” ukiumi matumani 2020-mi SIK-mi uteqqiaffineqartussat ilagaat. Tassunga atatillugu saqqummersinneqartut siullersaraat naqitaaraq qulequtaqartoq ”Sulisut sinniisaannut” – qulinik quppernilik SIK-p isumaqatigiissutai malillugit sulisut sinniisaannut paasissutissanik, siunnersuutinik kajumissaarutinillu imalik.
Siulittaasoq Jess G. Berthelsen naqitaaqqap, sulisut sinniisaannut tamanut, aallarterlaanut atuutereersunullu sammisitap, siulequtaanik allattuuvoq.
Naqitaaraq pappiaramut naqitigaq immikkoortortaqarfinnut tamanut nassiussuunneqassaaq, taakkunanngaanniit inunnut pineqartunut agguaassassanngorlugu. Aammali elektroniskimik pineqarsinnaavoq pisariaqartinneqaleraangat nammineq naqiterneqarsinnaanngorlugu. SIK-p nittartagaatigut aamma aaneqarsinnaavoq.
Sulisut sinniisaannut tunngatillugu saqqummersitassaq tulliuttoq tassaavoq videoaraq qulequtaqartoq ”Sulisunut sinniisuuneq”, februaarip ingerlanerani SIK-p nittartagaatigut Facebookikkullu siammarterneqassamaartoq. Tassani SIK-p siulittaasuata tullia Ludvig Larsen oqaaseqartunut ilaavoq, oqariartuutigineqartorlu pingaarneq tassaavoq suliffimmi sulisut sinniisoqaraangata suleqatigiilluartoqarnerusartoq toqqissisimasoqarnerusartorlu.
Sulisut qinigaasa nukittorsarneqarnissaat aamma qulequttanut ilaassaaq SIK-p Nakkutilliisoqarfiata marsip naalernerani ataatsimiinnissaani.
SIK-p isumaqatigiissutai malillugit sulisut sinniisaat nunami tamarmi 321-upput. Sulili amerlanerungaatsiarsinnaapput, tassa sulisut sinniisoqarnerat pillugu isumaqatigiissut naapertorlugu suliffimmi sulisut SIK-p isumaqatigiissutai malillugit atorfeqartut tallimaagaangata sulisut sinniisaannik qinersisoqarsinnaammat. Periarfissarlu tamanna tamakkiisumik atorneqanngilaq.
