Sulisut sinniisaannik qinersisarneq, sulisut sinniisaasa taamaatittut nalunaarutigineqartarnissaat, sulisut sinniisaasa allattorsimaffiat il.il. pillugit SIK-p allattoqarfianit aasami qaangiuttumi paasissutissiisoqarpoq erseqqissaataasumik. Tassami soorlu sulisut sinniisaannik taamaatittoqartillugu nalunaaruteqanngitsoortoqartaannarpoq.
SIK-p allattoqarfianit allakkiaq paasissutissiissutaasoq ilitsersuutaasorlu imaappoq:
SIK-p allattoqarfiani ilaannikkut misigisarparput sulisut sinniisaannik qinersinermut aamma sulisut sinniisaasa sinniisutut taamaatinnerannut atatillugu arlaannik naleqqutinngitsumik pisoqartarnera, tassunga ilanngullugit peqatigiiffiit SIK-p allattoqarfianut nalunaartannginnerat sinniisoq sinniisutut taamaatikkaangat.
Sulisut sinniisaannik nutaamik qinersineq pillugu pingaaruteqartut:
-
- Peqatigiiffiup akisussaaffigaa suliffeqarfimmi sulisunut sinniisoqarfiunngitsumi sulisut sinniisuannik qinersisoqarnissaa.
-
- Peqatigiiffiup akisussaaffigaa sulisut sinniisumik nutaamik qinersineq sulisut sinniisui pillugit isumaqatigiissutit atuuttut naapertorlugit ingerlanneqarnissaa (sulisut sinniisuinik qinersineq pillugu malittarisassat atuuttut SIK-p nittartagaani takuneqarsinnaapput ”Isumaqatigiissutit” toorlugu). Malittarisassat taakku malillugit ilaatigut allassimavoq sulisoq SIK-mi ilaasortaassasoq sinniisutut qinerneqassaguni.
-
- Isumaqatigiissutit ataasiakkaat malillugit sulisut sinniisuannik qinersinerup saniatigut aammattaaq sulisut sinniisaannut sinniisussamik qinersisoqassaaq, suliffeqarfinnili allani taamaallaat sulisut sinniisuannik qinersisoqassalluni sulisut sinniisaannut sinniisumik qinersisoqarani. Soorlu assersuutigalugu SIK-p aamma Naalakkersuisut sulisut sinniisaat pillugit isumaqatigiissutaanni allassimavoq sulisut sinniisaannut sinniisumik qinersisoqassasoq, SIK-lli aamma GE-p (Grønlands Erhverv) akornanni sulisut sinniisaat pillugu isumaqatigiissummi sulisut sinniisaannut sinniisumik qinersisoqarnissaa piumasaqaataanani. Taamaammat pisariaqarpoq peqatigiiffimmit aamma suliffeqarfimmi pineqartumi aalajangersimasumi sulisunit ilisimaneqarnissaa sulisut sinniisaannut sinniisussamik aammattaaq qinersisoqassanersoq.
-
- Suliffimmi sulisut tamarmik, SIK-p isumaqatigiissutaa malillugu sulisorineqartut, sulisut sinniisaannik qinersinermi peqataasinnaapput.
-
- Sulisut sinniisaannik nutaamik qinersisoqarnera sulisut sinniisaattut qinerneqartumit peqatigiiffik nalunaarfigineqassaaq.
-
- Sulisut sinniisaannik nutaamik qinersineq aatsaat atuutilissaaq qinersineq peqatigiiffimmit akuerineqarpat. Akuersineq pisinnaavoq peqatigiiffimmik ulluinnarni allaffimmi aqutsisumit, tamatuma kingornatigut peqatigiiffiup siulersuisuinut qinersinermik ilisimatitsisinnaasoq.
-
- Peqatigiiffiup immersugassaq (Sulisut Sinniisaasa Allattorsimaffiannut immersugassaq) immersussavaa sulisut sinniisaannik nutaamik akuersineq pillugu aamma taanna immersugaq SIK-p Allattoqarfianut nassiunneqassaaq. Immersugassaq SIK-p nittartagaani “Peqatigiiffiit > Sulinermi atortussat” pissarsiarineqassaaq.
-
- Immersugassami tassani aammattaaq sulisitsisup atsiornera allassimassaaq, tassalu sulisitsisup immersukkami atsiornissaa peqatigiiffiup isumagisassaraa.
-
- Peqatigiiffiup immersukkap assilinera sulisitsisup nassiutissavaa sulisut sinniisaannik qinersinerup peqatigiiffimmit akuerineqarneranik ilisimatitsissutitut.
-
- Peqatigiiffiup sulisut sinniisaata suliassai pillugit sulisitsisumik pineqartumik isumaqatigiissuteqartariaqarpoq, tassunga ilanngullugu sulisut sinniisaata suliaminut piffissap qanoq annertutigisup atorneqarnissaanut. Iluaqutaassaaq isumaqatigiissut tamanna allakkatigut isumaqatigiissutaappat.
-
- Peqatigiiffik sulisut sinniisaat nutaaq sulisut sinniisaattut qinikkatut suliassai pillugit saqqummiussisariaqarpoq, tassunga ilanngullugit sulisut sinniisaannut isumaqatigiissutit naapertorlugit akisussaaffii pisussaaffiilu pillugit ilisimatillugu.
-
- SIK-p Allattoqarfiata nutaamik sulisut sinniisaanni qinersisoqarnera pillugu immersugaq peqatigiiffimmit tiguppagu sulisut sinniisaattut nutaatut qinigaq SIK-p Sulisut Sinniisaat pillugit Allattorsimaffimmut nalunaarsussavaa (allattorsimaffimmi tassani nuna tamakkerlugu sulisut sinniisaat nalunaarsugaapput SIK-p nittartagaani ”Sulisut sinniisaat”-ni pissarsiarineqarsinnaasoq).
-
- SIK-p allattoqarfiata sulisut sinniisaannik nutaamik qinersineq peqatigiiffimmit tiguppagu allattoqarfiup sulisut sinniisaat nutaaq tikilluaqqullugu allaffigissavaa, tassani ilaatigut sulisut sinniisaannut pikkorissartitsinermi peqataasinnaaneranut periarfissamik ilisimatillugu.
Sulisut sinniisaattut sulinerup taamaatinnera pillugu pingaaruteqartut:
-
- Sulisut sinniisaannut isumaqatigiissutini atuuttuni malittarisassaqarpoq qaqugu aamma qanoq sulisut sinniisaattut qinigaasoq sulisut sinniisaattut taamaatissinnaanersoq / taamaatissanersoq. Pingaartuuvoq peqatigiiffiup malittarisassanik tamakkuninnga ilisimasaqarnissaa pisumi siunnersuisinnaanissaminut.
-
- Peqatigiiffiup sulisut sinniisaata taamaatinnera ilisimaleruniuk peqatigiiffik SIK-p allattoqarfia tamanna pillugu ilisimatitsissaaq. Tamanna pissaaq e-mailimik sik@sik.gl -imut ilisimatitsinikkut.
-
- SIK-p allattoqarfiata tamatuma kingornatigut sulisut sinniisaattut taamaatittoq sulisut sinniisaasa allattorsimaffiannit piissavaa.
-
- Peqatigiiffiup akisussaaffigaa suliffimmi pineqartumi sulisut sinniisaannik nutaamik sulisut akornanni qinersisoqarnissaa. Tassa sulisut sinniisaat taamaatippat peqatigiiffiup suliassaraa suliffimmi pineqartumi sulisut nutaamik sulisut sinniisaannik qinersinissaat.
Sulisut sinniisaasa allattorsimaffiat:
SIK-p allattoqarfiata akisussaaffigaa Kalaallit Nunaanni sulisut sinniisaasa tamarmik allattorsimaffiata nutartertarnissaa. Taanna tassaavoq uagut ulluinnarni Sulisut Sinniisaasa Allattorsimaffiannik taasagarput.
Allattorsimaffik taanna taamaallaat atorneqarluarsinnaavoq peqatigiiffik SIK-p allattoqarfianut nalunaartarpat suliffimmi nutaamik sulisut sinniisaannik qinersisoqarsimaneranik nalunaartarpat, imaluunniit sulisut sinniisaat suliffimmi sulisut sinniisaattut taamaatippat.
Aammattaaq peqatigiiffiit ataasiakkaat tamarmik kajumissaarneqarput akuttunngitsumik sulisut sinniisaasa allattrsimaffiannik taassuminnga misissuisarnissaat, taamatut qulakkeerneqassammat allattorsimaffimmi allassimasut eqqortuunersut. Peqatigiiffiup takusinnaappagu inuk sulisut sinniisaattut taamaatissimasoq allattorsimaffimmi allassimasoq, taava tamanna SIK-p allattoqarfianut e-mailikkut imaluunniit sianerluni nalunaarutigineqassaaq. Taamatuttaaq pisoqassaaq peqatigiiffiup allattorsimaffiup misissornerani paasiguniuk sulisut sinniisaat allattorsimaffimmiinngitsoq.
Immersugassaq nutaaq piffissami qaninnerpaami suliarineqassaaq:
SIK piffissami qaninnerpaami sulisut sinniisaannik qinersineq pillugu immersugassamik nutaamik suliaqassaaqpeqatigiiffinnullu nassiullugu – soorlu aamma immersugassaq SIK-p nittartagaani pissarsiarineqarsinnaassasoq.
Naatsorsuutigineqarpoq immersugassaq taanna nutaaq septembarimi peqatigiiffinnit pissarsiarineqarnissaa, tamatuma kingornatigut immersugassaq taanna nutaamik sulisut sinniisaannik qinersinermi atorneqartassalluni. Tamatuma tungaanut immersugassaq massakkut atuuttoq atorneqartassaaq.
Nutaamik immersugassamik suliaqarnissamut tunngaviuvoq maannamut immersugassaq arlalinnik aaqqiissuteqarfigineqartariaqarmat ajornanngitsumik atorneqarsinnaasunngorlugu.
Suleriaatsinik allattukkat SIP-mut tunngasut aamma SIK-p akisussaaffia:
Ukiut arlallit matuma siornatigut SIK suliaqarpoq qulequttat assigiinngitsut pillugit suleriaatsinik allattukkanik – suliat qanoq suliarineqartarnissaannut nassuiaammik – tassunga ilanngullugu sulisut sinniisaat pillugit suleriaatsit. Suleriaatsit naammassineqarmata peqatigiiffinnut nassiunneqarput, aammattaarli ilaannikkut arlaleriarluni peqatigiiffinnut nassiuteqqinneqartarlutik. Kingullermik peqatigiiffinnut 2024-mi nassiunneqarlutik. Taakku aammattaaq SIK-p nittartagaani atuarneqarsinnaapput ”Peqatigiiffiit > Suleriaatsinik allattukkat”.
Innersuussutigineqarpoq sulisut sinniisaat pillugit suleriaatsinik allattukkat atuarneqarnissaat, sulisut sinniisaannik qinersineq pillugu paasissutissanik pingaaruteqartunik arlalinnik imaqarmat, aamma taamatut suliaqartarnerup taamaatinneqarnera pillugu, soorlu aamma sulisut sinniisaasa allattorsimaffiat pillugu pingaaruteqartunik paasissutissanik imaqarmat aamma sulisut sinniisaasa suliffinni suliaqartarnerat pillugu.
SIK-p allattoqarfia saaffigiuk: SIK-p Allattoqarfia tamatigut saaffigineqarsinnaavoq sulisut sinniisaasa suliaqarnerat pillugu apeqquteqartoqassappat, tassunga ilanngullugit sulisut sinniisaannik qinersinermi malittarisassat atuuttuusut pillugit aamma sulisut sinniisaattut taamaatinnermi.