Danmarkimi sulisut kattuffiisa ilaat Teknisk Landsforbund (TL) aamma Sulinermik Inuussutissarsiuteqartut Kattufffiat (SIK) isumaqatigiipput TL-p Kalaallit Nunaanni ilaasortaminik ”Kalaallit Nunaanni teknikerit isumaqatigiissutaat” malillugu sulisunik isumaqatiginninniussisarnera SIK-p tigussagaa 1. juuli 2021-mit atuutilersumik.
Tamatuma kingunerisaanik Kalaallit Nunaanni sulisunut taakkununnga isumaqatigiissutit nutarterneqartussanngoraangata SIK isumaqatiginninniartuusalissaaq. Taamattaarlu isumaqatigiissutit isumaat assortuussutigineqalissagaluarpata tamatumani SIK isumaqatiginninniartuussaaq.
Taamaalilluni TL-ip Kalaallit Nunaanni ilaasortani 28-usut ilisimatissimavai akissarsianut atorfeqarnermullu tunngasutigut, soorlu soraarsitaanermikkut, sullinneqartariaqaleraangata SIK-p ikiorsinnaasassagai.
Tamanna tunngavigalugu TL-ip isumaqatigiissut taaneqartoq naapertorlugu sulisuusut kaammattorpai SIK-mut ilaasortanngoqqullugit, taamaalillutik siunnersorneqarsinnaanertik qulakkeerniassammassuk.
”Isumaqatiginninniarnissamut pisinnaatitaaneq SIK-mut tunniupparput tassani ilaasortavut qanillugit ikiorsinnaammagit siunnersorsinnaallugillu, uagummi Danmarkimit taama qanitsigisumik sullissinnaannginnatsigit. SIK nalunngilarput, qularutiginngilarpullu teknikerinut Kalaallit Nunaanniittunut ajunngilluinnartumik isumaqatiginninniussisinnaasoq,” taama oqarpoq Jannik Frank Petersen, Teknisk Landsforbundimut siulittaasoq.
Isumaqatigiissut pillugu paasisaqarneruniaraanni attavigineqarsinnaasut:
Susanne Olsen, SIK (siunnersorti), tlf. +299 32 21 33 imaluunniit e-mail suso@sik.gl
Morten Terp, TL-imi tusagassiisarnermut akisussaasoq, +45 42 40 62 60 imaluunniit mte@tl.dk
Birthe Bruun Antvorskov, TL (pisortanik isumaqatigiissuteqartarnermi aamma Kalaallit Nunaannut tunngatillugu sullissisoq), tlf. +45 33 43 65 84 imaluunniit e-mail bba@tl.dk