Tunisineq tunisanillu tigooqqaaneq ataqatigiissaagassaapput

Soorunami ataqqivara SQAPK-p ilaasortani sullillugit piumasaat aallaavigalugu sulimmat. Taamaattoq kusaginngilara SQAPK-p KNAPK taamak kusanaatsigisumik tusagassiuutitigut nalunaaruteqarnermi upissummagu, allaat imatut nipilerlugu kilisaataatillit angisuut kisiisa sullikkai. SIK-p siulittaasuanit oqaaseqaat

Isumaqarpunga SQAPK-p aammalu KNAPK-p tusagassiuutitigut oqaloqatigiinnerannut akuleruttariaqalerlunga. SQAPK-p tusagassiuutinut nalunaarutaani takuneqarsinnaanvoq Fiskerikommissionimi ilaatigut sulinerput pillugu oqariartuuteqarsimasoq, naak tamatta nipangersimasus­saa­titaanermik atsioqatigiinnikuugaluartugut.

Immaqa aperisoqarsinnaavoq sooq SIK Fiskerikommision-imi inissisimatinneqarnersoq toqaannartumik aalisarnermik suliaqarani, aap imaassinnaavoq toqqaannartumik aalisanngitsugut, kisianni annertuumik aalisakkerivugut. Aalisartut aalisanngippata uagut suliassaqanngilagut, aalisartullu tulaassivissaqanngillat aaliasakkerivimmi sulinngikkutta. Taamaammat aalisarneq nunamilu sulineq imminnut ataqatigiilluinnarput, taamalu aalisarneq suleqatigiiffineqartariaqarluni.

Assersuutigalugu maanaannaq qaleralinniarsinnaanermut allagartanik amerlasuunik tunniussisoqarpoq, taamatullu tunniussisoqarnerani aamma uagut ilaasortatta ilai tunine­qar­put, aammalu nunami sulisut arlallit qaleralinnialerput, allaat ulluinnarni Taxartartut qaleralinniarsinnaanermut allagartamik tunineqarlutik.

Aalisartut inuussutissarsiutigalugu aalisavissut aalisarlik, uagullu nunami sulisartut aalisartut tulaataat suliarissavgut.

Nunaqarfinni pisassiissutit qaffannerisa kingunerisaanik tunitsiveeqqat malinnaaneq aju­le­raluarput, aammalu sulisut malinnaaneq ajuleraluarlutik, allaat ilaatigut sulisut ataasi­ak­kaat 18 tiimit sulisariaqartarlutik tunisisunut malinnaaniarneq peqqutigalugu. Tunisinerup aammalu nunami tulaatanik tigoqqaanerup atatigiissagaanissaa qanoq pingaaruteqartigisoq tassani erserpoq.

Soorunami ataqqivara SQAPK-p ilaasortani taamatut sullillugit piumasaat aallaavigalugu sulimmat. Taamaattoq kusaginngilara SQAPK-p KNAPK taamak kusanaatsigisumik tusagassiuutitigut nalunaaruteqarnermi upissummagu, allaat imatut nipilerlugu kilisaataatillit angisuut kisiisa sullikkai.

Matumani oqartariaqarpunga taamatut misiginngilluaasarakku, illuatungaatigulli ilaasor­tami ukiut 30-it qaangiuppata aamma aalisaannarsinnaanerat aallavigalugu KNAPK suli­su­tut isigigakkut.

Tassanilu SIK KNAPK-lu alloqatigeeqqissaarlutik ingerlapput, tassami soorlu assersuutiga­lu­gu sinerissami qaleralittassat appartinneqassappata nunami sulisut aamma eqqorneqartussaapput, tassami suliassaat annikillissammata, tamannali SIK-p inooqataaffigisinnaavaa piffissaq ungasinnerusoq eqqarsaatigalugu, tassami kissaatigeqaarput kinguaatta maani nunami suliassaqartuaannarnissaat.

Eqqaamassavarpummi maani nunami aalisarnerup tamangajatta inuutimmatigut, aalisapilunnerlu ingerlaannassappat tamatta pinngitsoqarata eqqorneqartussaavugut, imaasiallaannaq aaqqiivigneqarsinnaangitsumik. 

SQAPK-p kulturerput eqqartorpaa, eqqaamassavarpullu siuligut piniagassanut ataqqinartumik kultureqarsimammata, piniagassatik paaralugit ataqqillugit piniapilunnaaveersaarlutik ingerlajuarsimapput, siuligullu taamatut inooriaaseqarsimanngikkaluarpata maani nunami maannakkut inuusimanavianngikkaluarpugut.

Siornaakkut Atammimmi aalisartunik paasitinneqarpunga Maaniitsuminngaanniik saarulliit uumatillugit milluaasartoq Niaqunngunamut pulaniarsimagaluartoq itigartissimagaat, uki­ut 30-it qaangiuppata suli saarullinniarsinnaanissartik kissaatigigamikku, taakkualu aam­ma meeraat ukiut 30-it qaangiuppata sarullinniarsinnaaniassamata. Taamatut aalia­ngerput naak nalunngikkaluarlugu sukkasuumik aningaasarsiupallasinnaagaluarlutik, pisariinnerusumillu sulisinnaagaluarlutik, kisianni taamatut aaliangerput aalisartut piffissaq ungasinnerusoq isigalugu aalisaannarsinnaanissaat pingaartikkamikku. Taamaasillunittaaq aamma SIK-mi ilaasortagut taakkulu meeraat ukiut 30-it qaangiuppata aalisakkerivimmi suliinnarsinnaanngorput.

Jess G. Berthelsen
Kattuffiup siulittaasua