”Siulittaasup allattaa”. Estrella Mølgaard Thomsenip atorfia taama taaneqarpoq sulisartut kattuffiata SIK-p allattoqarfiani sulisut allattorsimaffianni kattuffiup nittartagaaniittumi. Taamatullumi atorfeqarnermini ukiut 20-nngussavai decembarip aallaqqaataani 2022.
Tassa katillugit ukiut 20-t. Tassami aappassaanik siulittaasup allattaatut suligami, ukiut marlussuit allameeriarluni uterami taamatut atorfeqaleqqissimalluni.
Tamanna eqqaallugu ippassigami suleqataa sutortarfimmi suleqatiminut oqarpoq: “Ila Estrella taama sivisutigisumik tassaniikkami nersunaqaaq.” Nalaatsortumik Estrella saneqquppoq qanorlu oqaluttoqarnera tusaallugu, allamillu oqanngilaq: “Aammami suleqatigiikkatta!”
Taama sivisutigisumik suliffimmi ataatsimi atorfeqartoqartarnera qaqutigoorpoq. Sulilu qaqutigoorneruvoq pisortaq taannaasoq sullillugu suliffimmi ataatsimi atorfeqartoqartarnera.
Ukiualunni KNR-ip pisortaa Peter Frederik Rosing allattaaffigeriarlugu Estrella SIK-mi sulilersimavoq, siulittaasup allattaatut atorfik nutaaq inuttalerlugu.
Tamanna Estrellamut namminermut siulittaasumullu Jess G. Berthelsenimut naleqqutivippoq. Inuiaqatigiinni pissutsinik soqutiginninneq kisitsisilerinermik naatsorsuinermillu nuannarisaqarnermik akullugu. Tassa aatsaat.
Piginnaasammi taakku siulittaasup kattuffiup allaffiani suleqatiminit qaninnerpaanit pisariaqartikkajuppai. Taamalu Estrella Mølgaard Thomsen susassaaleqinngivittarpoq, ilami aamma Jess G. suliassaqartuaannarami paaserusutaqartuaannarlunilu.
Estrella Mølgaard Thomsen: ”Telefonilerigaangama pilluaatigisarpara ilaasortanik oqaloqatiginnittarnera, inussiarnerlutik ilisarisimasamittut pisarmannga. Taamaalillungami periarfissaqartarpunga kattuffimmut ilaasortaasunik oqaloqatiginnilaarnissannut oqaasiinullu tusarnaarnissannut.”
Kattuffimmi suliassaasinnaasut tamaasa ukiut ingerlaneranni Estrellap aqqusaarpai: Allattoqarfimmi pisortaagallartutut pingasoriarluni sulivoq. Isumaqatigiinniarnerni amerlanerpaani peqataasimavoq – ullumikkulli konsulentinut isumaqatigiinniarnernik piareersaallutillu ingerlatsisunut siunnersortaanerusarluni. Aningaasateqarfiit SIK-p ingerlatai tamaasa ingerlatseqataaffigisimavai – isumaginninnermut aningaasaateqarfiit, feriefondi, qaammarsaanermut ilinniartitaanermullu aningaasaateqarfik kiisalu suliffissanik pilersitsinermut aningaasaateqarfiusimasoq. Siulersuisuunerit ulluinnarnilu aqutsisut (siulittaasoq aamma siulittaasup tullia) ataatsimiittarnerini nunarpullu tamakkerlugu angalasarnerini sullitarai – minnerunngitsumillu: Ilaanneeriarluni telefonilerisarpoq.
”Telefonilerigaangama pilluaatigisarpara ilaasortanik oqaloqatiginnittarnera, inussiarnerlutik ilisarisimasamittut pisarmannga. Taamaalillungami periarfissaqartarpunga kattuffimmut ilaasortaasunik oqaloqatiginnilaarnissannut oqaasiinullu tusarnaarnissannut,” Estrella killitsisimarpalulaalerluni oqaluttuarpoq.
Inuusukkallarami tusagassiortunngorniarnissaminut pileritsassimagaluarpoq. Nuannaartoralugumi tusarnaagarilluarsimavaa tusagassiortoq Kaj Peter Svendsen, soqutiginartumik periaaseqarluni radiukkut aallakaatitassiortartoq.
Kisianni Ikast Handelsskolemi ilinniarpoq, tassa Estrellap angutaa kilisaataateqarami tamatumunnga kajumissaarimmat. Tamatumalu kingorna allaffimmi kilisaammut ataatami piginneqataaffigisaanut sullissisumi sulivoq. Tassanilu Estrellap kisitsisilerinermut kakkattuunera inuussutissarsiornermut atatillugu atorneqaleqqaarpoq.
Tamatuma kingorna sulisartut kattuffianni SIK-mi ukiorpassuarni sulineq Estrellap ilinniagaqarusuttuusup ullut tamaasa nutaanik ilikkagaqarnissamut periarfissatut atorpaa:
”Jess-imik sullissineq suleqatiginninnerlu ilinniarnartuuvoq. Pissutsinik ajornartorsiutaasinnaasunillu ataqatigiissitsilluni paasinneriallaqqissusia tupinnaannarpoq, tamannalu uannut ilinniutaasunik suliassaqalersitsisarpoq. Tassa ilinniarneq nuannersoq! Jessilu aamma pilluaqqorusuppara, tatiginninneranullu qujangaarpunga!”
Ukiunik 20-nngortorsiorneq sisamanngorpat 1. decembari 2022 kattuffiup allattoqarfiani sulisut katersortilaarnerisigut malunnartinniarneqassaaq.
PS! Decembarip aallaqqaataani 2022 Estrellap atorfimmi ukiunik 20-nngortorsiornera malunnartinniarlugu SIK-mi sulisut ilasseqatigiinneranni siulittaasoq Jess G. Berthelsen nuannersumik paasissutissaalluartumillu oqaaseqarpoq. Ilaatigut oqaatigaa Estrella rekordiliisoq, tassa SIK-mi atorfilittut maannamut sivisunerpaamik suligami.