SIK-mi sulinermini ukiunik qulinnguisoq kattuffiup Nuummi allattoqarfiani allaffimmini.
Sofie Svendsen arfininngormat ullaakkut iterpoq tassa 21-nik ukioqarluni sulisartut kattuffianni SIK-mi inuusuttunut siunnersortitut atorfininnerminit ukiut qulinngoriikatattut.
Taamani 15. oktobari 2012-imi ullup ilaannaani sulisartussatut atorfinippoq. Sivitsunngitsorli unnuit ilannguttalerpai. Ilami SIK-mit suliassarititaasut sammisassarititaasullu inuusuttumut taassumunnga 2011-mi Aasianni ilinniarnertuunngorsimasumut aammalu inuiaqatigiilerinermik nuannarisaqaqisumut soqutiginaqigamik piffissaq sisuuginnavissutut ittarpoq.
Taamaattumillu aamma iluariinnarpaa aappaaguani siunnersortitut ulloq naallugu atorfinitsinneqarami. Taamaalinerani suliassanik SIK-p isumaginninnermut aningaasaateqarfiinut inuit pingaartilersimaqisaannut tunngasunik suliaqartalereersimavoq – tassa soorlu perulunnartumik nappaateqarlutik katsorsartikkiartortunut ilaqutaasutut ingialluinissamik qinnuteqaatinik. Aamma sulisartut peqatigiiffiinut ilaasortaasut atorfinitsitaanerup sulinermilu atugarisat tungaatigut ikiortariaqalersut sullinneqarneranni suliassat amerliartortut peqataaffigilerpai, tamannalu ingerlatseqataaffigaa SIK-p allattoqarfiani suliassanik agguataarinerup nutaap 2022-p qiteqqunnerani atuutilernissaata tungaanut.
Kalaallit Nunaanni Inatsisilerinermi sullissisutut ilinniaqqinneq 2017-imi SIK-mi suliitigaluni naammassivaa. Tamanna nammineq piginnaassutsimigut nukittorsaatigaa, aammalumi kattuffiup ilaasortaminut sullissinerani nukittorsaataavoq.
Sofie Svendsen taamaalilluni ukiuni qaangiuttuni qulini SIK-mut tunngatillugu malunnaateqartumik akuuvoq, sulisutut aammali qinikkatut.
2013-imi SIK-p Inuusuttaanik pilersitseqataavoq. Tamatumalu kingunerisaanik SIK-p siulersuisuunerinut ilannguppoq ukioq taanna SIK ataatsimeersuarmat, taamanerniillu siulersuisuunernut ilaasortaajuarpoq. Aammali Nuummi sulisartut peqatigiiffianni NSIP-mi, SIK-p immikkoortortaasa ilaanni, 2018-imiilli siulittaasumut tulliuvoq. Taanngitsoortariaqanngilarlu soraarnerussutisiassaqarfiup SISA-p siulersuisuinut ilaasortaammat.
Tassa akuleriiaanik susassaqarfippassuaqarnera maluginiarneqarsimassaaq. Sofie Svendsenili nalorninngilaq. ”Naluneq ajorpara sumiinnerlunga”, qungujuummilluni taama erseqqissaavoq.
SIK-p nittartagaani sulisut saaffigisassat allattorsimaffiat naapertorlugu Sofie Svendsenip ullumikkut suliassaqarfii tassaapput ”Isumaqatigiissutit. Ilinniartitaaneq suliffeqarnerlu”. Tassa kisitsisilerinermik, inuiaqatigiinni aaqqissuussaanermik piginnaanngorsaanermillu soqutigisaqartumut sammisaqarfigissallugit tulluavissut.
Aammami ukiuni arlalinngortuni sulisut sinniisaasa pikkorissarneqartarneranni annertuumik akuusimavoq pikkorissaaqataasarnermigut.
”Ilisimalikkanik allanut tunniussisinnaaneq pingaarteqaara – tassa aamma misilittakkanik piginnaasanillu avitseqatigiinnissaq, imaappoq peqataatitsinissaq. Tamanna kattuffiup iluani naligiissumik kivitseqatigiissinnaassagutta iluaqutaallunilu pisariaqarluinnassaaq,” Sofie Svendsen oqarpoq.
Ukiunik qulinngortorsiorneq tallimanngorpat kattuffiup allattoqarfiani sulisut katersortilaarnerisigut malunnartinniarneqassaaq.