Arfininngornermi 20. januaari 2024 Nuummi unnuk kulturisiorfiummat unnunnissaa utaqqinagu SIK ualikkut pulaartitsivoq.
Qaaqqusineq tusarneqarluarpoq, kattuffiullu illuata illoqarfiup ilaani illusialaartumiinnera unissutiginagu inuit aggiapput. Saaffiginnittarfimmi allattuineq naapertorlugu ualeq taanna pulaartut 209-upput.
Aammalumi ualeq tamarmi nuannisaarfiulluarpoq. Pulaartut ilimagisamit amerlaneroqimmata pulaartitsisut allaat naggataatigut meeqqanut tunniussassaminnik nunguutsisoorput.
Assilisavut quppernermi maaniittut ualip qanoq ingerlaneranik takussutissiipput. Meeqqat titartaallutillutillu qalipaapput – imaluunniit kattuffiup siulittaasutoqaata Jess G. Berthelsenip eqqaamasalersaarutaanik atuakkamik qupperaallutik – inersimasullu kaffisorlutillu tiituupput kaagisorlutillu, filmeeqqat sulisut sinniisoqarnerannut kattuffiullu oqaluttuarisaaneranut tunngasut isiginnaajutigalugit, tassami apeqqutinik taakkununga tunngasunik akisassaminnik tunineqaramik.
Pulaartut tamarmik taamaalillutik makitsinermi peqataatinneqarput, makitaasut pisiniutissaminnik akissarsisinneqarlutik. Makitsineq Facebookikkut toqqaannartumik aallakaatinneqarpoq.
Nuannisaarnermullu ilasaataalluarpoq pulaartut ilaat, quiasaarisartoq aliikkusersuisartorlu kikkut tamarmik nalunngisaat Piitannguaq Alaufesen ataatsimiittarfimmi guitarerluni appiinnaqimmat, ilami ataatsmiittarfimmi iikkami guitari nivingatinneqartoq atorfissaminut atorneqartariaqarmat.
Taamaalilluta aappaagu ualikkut kulturisiornissatsinnut qilanaalereerpugut.
Assit ilaat toorukku assit saqqummersitat tamaasa allisillugit isiginnaarsinnaavatit
