Uummannami maajip aallaqqaataani oqalugiaat

Uummannami SIK-p immikkoortortaani siulittaasup Jokum Zeebip oqalugiaataa maani atuarneqarsinnaavoq.

Kingumut ullumikkut maj aallaqqaataani nunarsuarmi tamarmi sulisartut ulluanni qamannga pisumik tamassi tikilluaritsi, minnerunngitsumik maani peqataasut peqataanissigut takutipparsi 1. maaji qanoq aamma ilissinnut ulloq pingaartigisoq maani najuunnissigut takutikkassiuk.  SIP-mi ilaasortat, sulisut sinniisaat, allallu maani najuuttusi tamassi pilluaritsi, mininnagu SIP-mi ataqqimaammik ilaasortaq. 

Sulisartoqatikka, kaammattussuassi sulisitsisunut sutigut tamatigut ataatsimoorluta ataatsimut nipeqarluta suleqatiginnittariaqaratta, aatsaat taamaaliornitsigut annerusumik angusaqamissarput qulakkiissagatsigu. 

Avannaata Kommuniani kommunalsbestyrelsimut qinigaasut nutaat suleqatigilluarnissaat qilanaaraarput. Neriuutigaarpullu aaqqissuussineq nutaaq ilaasortanik sullissinitsinni annertuumik pitsanngoriaataassasoq, tamatumunnga ilanngullugit suliffinnik nutaanik pilersitsiniamerit. 

Ilanngullugu taarusupparput tunisassiorfik nutaaq Polar Seafood aalisakkanik suliffissuaq piariingajalersoq neriuppugut suleqatigilluarumaaripput. Tunisassiorfiup pisortaata oqaloqatiginerani paasisimavarput ullumikkut inuit 15-18-it amerlanerusulluunniit sulisorineqassasut, aammalu neriuppugut sulisussanik aallartinnerminni amigaateqassanngitsut.

Tunisassiorfittaassaq innuttaasunut annertuumik aningaasarsiornikkut ilaqutariinnut tamanut inuuniarnikkullu sunniuteqarumaartoq neriuutigaarput. Pisortaallu siunissami suleqatigilluarumaarlutigit. Tamatuma kingunerissammagu sulisut toqqissisimallutik suliffimmini sulisarnissaat. Tamatumammi kingunerisarmagu tunisassiornermi naammassisat annerulertarneri.

Ilanngullugu ilaasortanut piumasarissavarput aappaagu pisortanut isumaqatigiinniarnermut tunngatillugu, aningaasartuutinut naleqquttumik, akissarsianut naleqqiullugit piumasaqaatiqartariaqartut. Akissarsiammi ullumimut naleqqunnersut ilissi nalilersuisariaqarpusi piumasaqaateqarlusi, piumasaqaatisilu SIK-mut ingerlateqqittassagatsigit tapersiuteqarluta. 

Naggataatigut ilaasortat: Suliffeqarfinni sulisut sinniisaat suleqatigalugit sulisitsisut suleqatigilluartariaqarpavut, ilaasortatta sulinermi atugaat sorsuutingalugit, ataatsimoorluta oqariartuuteqarluta saqqummertassagatta, tattuffipput SIK suleqatigalugu. 

Kikkulluunniit oqaaseqarsinnaapput.

Ulloq nuannersumik atorluarisiuk, qujanaq.


Uummannami SIP-mi siulersuisut (saamerlermit): Frederik Kristiansen, Rosine Fleischer, Jokum Zeeb (siulittaasoq), Nivi Hansen Larsen (siulittaasup tullia) aamma Jørgen Abelsen (allatsi).