Uummannami sulisartut peqatigiiffiata pilersinneqarneranit ukiut 65-inngornerat malunnartinniarneqarpoq. Siulittaasup Jokum Zeebip oqalugiaataa maani atuarneqarsinnaavoq.
Aluu sulisartoqatikka. SIP-mi ilaasortat SIK-miillu najuuttut. Ataqqinaammik ilaasortaq. Siulersuisunut ilaasortat aammalu siulersuisuusarsimasut. Qaaqqusat suliffeqarfinni ittuusut nigiuusullu tamassilu maani najuuttusi.
Uummannami Sulisartut Peqatigiiffiat sinnerlugu uummammit pisumit tamassi tikilluaritsi, neriuutigaara unnuk nuannersumik ingerlakkumaarlutigu.
Maani katersuunnitsinnut pissutaavoq sulisartutut peqatigiiffipput ukiut 65-iliinera nalliuttorsiutigigatsigu. Sulisartoqativut ataqqinartut taamani, ullumikkut pissutsinut sanilliullugu pissutsit allarluinnaagallarmata, sulisartutullu atukkamikkut pitsanngorsagassarpassuaqarnertik tunngavigalugu 1951-imi sulisartut peqatigiiffiat pilersissimavaat, aqqut allanit aqqutigineqarsimanngitsoq atorlugu.
Sulisartut peqatigiiffittaarsimapput sulisitsisut taamanikkut ilaatigut sulisorisaminnut atugassarititaat naammaginanngilluinnartut pitsanngorsarumallugit, atugassarititaasullu naalakkiutaannartut isikkoqartartut akiorniarlugit. Oqareernittut pissutsit taamanikkut allarluinnaapput, taamaammallu peqatigiiffilioqqaarsimasut sulisartoqativut siulittaasuusarsimallutillu siulersuisunut ilaasortaaqataasarsimasut qunusuillutik ullumikkut atugassarititaalersimasut anguniarlugit sorsuuteqartarsimanerannut uagut maannakkut nangitsisugut annertoqisumik qujassutissaqarfigaavut.
Tamanna eqqarsaatigigaangakku isumaliortarpunga siulitta sikuaq ingerlaviginiaqqaaleraagamikku mianersorluinnartariaqartarsimanerat, kisiannili aamma sapiisersinnaassuseqarneq uumaniarnissamut ilaalluinnartoq mininnagu atorlugu sikuaq mattunersiorlugu aqqutissarsiortarsimapput. Taamatorluinnaq sulisartunut atugassarititaasut pitsanngorsarniarlugit sulineq ingerlanneqartarsimavoq.
Atugassarititaasut pitsanngorsarniarneranni mianersorfissat arlaqartarsimapput, sulisitsisut ilaasa mianersorfissaaneri eqqarsaatigalugit.
Nalunanngilaq maani illoqarfitsinni sulisartoqarnerup tungaatigut sulilluartunik peqatigiiffik inuttaqartarsimasoq, soorlu Maarmorilimmi aatsitassarsiorfimmi sulisartuusimasunit misilittagaqarluartunillu sulisoqartarsimavoq.
Kattuffipput SIK suleqatigalugu Maarmorilimmi pissutsit sukaruttormata, allaat sulinerit unitsinneqartariaqartarsimapput, kalaaleqativut maani nunaqavissut avataanit suliartortitaasunit akissarsialutsitaanerat atorunnaarsinniarlugu. Peqatigiiffipput kattuffippullu sorsuttariaqartarsimavoq, politikkikkut qinikkanit ilaatigut tapersersortissarsiortariaqarsimallutik sulisartut atugarisaat pitsanngorsarumallugit, inuiannullu avataaneersunut atugassarititaasut aammattaaq kalaallinut atugassaritinneqarnissaat anguniarlugu.
Ilaatigut inuppassuaqartarpoq isumaqartunik sulisartut peqatigiiffiannut ilaasortaanngikkaluarunik tamanna ajoqutaanavianngitsoq, allaammi immaqa isumaliortoqartarpoq peqatigiiffeqanngikkaluaraanniluunniit ajornavianngitsoq. Taamatut eqqarsarneq kukkusuuvoq. Peqatigiiffeqaratalu kattuffeqaratalu ingerlagaluarutta kikkut akissarsiat pillugit isumaqatiginninniussisassagaluarpat? Sulisartut eqqunngitsumik misigitinneqartut kikkunnit sernissorneqassagaluarpat? Sulisut sinniiseqarnerat pingaaruteqartorujussuuvoq amerlanerusunillu iluaqutiginiarlugu eqqumaffigineqarnerusariaqarluni.
Suliaq suugaluarpalluunniit suliffimmi sulisartut sulisitsisullu akornanni paaseqatigiilluni sulisar-tunillu ataqqinnilluni pissuseqarnissaq sulisartut peqatigiiffiannit pingaartorujussuartut isigaarput.
Qujanartumillu ukiuni kingullerni sulisartut sulisitsisullu akornanni pissutsit paaseqatigiiffigiumaneqartutut isikkoqarput.
Qujanaqaarlu peqatigiiffipput ukiorpassuarni aalajaalluni ilaasortaajumasunik tapersersuisunillu tunuliaqutsersorneqartuarmat, aammalu nunaqarfittatsinnit aamma ilaasortartaartuartarnerput nuannersuuvoq.
Taamatut oqaaseqarlunga aammalu SIK-miit maani najuuttoq Kasper aamma Poul peqataanerat nuannaarutigalugulu , tamassinnut qujarusuppunga, maani nalliuttorsiornitsinni peqatigigatsigut. Qujanarsuaq.
Taamatullu nunaqarfitsinni attaveqaativut maani peqataasut ullormik ataatsimik pikkorissartissimavavut isumaqatigiissutinut sulisullu sinniisaannut tungasut, aamma ilaasortanut illersuiniarluni suleriusissaq pikkorissaatigineqarluni, pikkorissaasumullu qujanaq.
Kikkulluunniit Uummannami SIP-mi suleqataasimasut ataqqiniarlugit qutsaviginiarlugillu nipaallisimallatsiarnissarput qinnutigissavara.
Qujanarsuaq tamassi.
Jokum Zeeb
SIP-mi siulittaasoq