Suliffinnut pulaarnerit, sulisut sinniisaannik kattuffiullu immikkoortortaasa siulersuisuinik ataatsimeeqateqarnerit, innuttaasunik ataatsimiititsinerit inunnillu naapitanik oqaloqatiginninnerpassuit. Tamakkuupput SIK-p siulersuisuunerisa Uummannamut eqqaamiuinullu sapaatip-akunnerata ataatsip ingerlanerani kaajallaanerminni ukkatarisaat.
Umiatsiap angallatigineqartup atortorissaarutiminik aserortoorneratigut nunaqarfiit orninneqartussaagaluartut ilaat ataaseq, Ukkusissat, orninneqanngitsoorpoq, nunaqarfimmilu allami, Saattuni, pisassat ikililerneqarlutik. Taamaattorli aggustip 15-ianit 22-anut angalanermi pissarsiat naammagisimaarneqarluarput paasissutissanik isummanillu paarlaasseqatigiilluartoqarmat suliffinnilu pissutsinik soqutiginartunik paasisaqartoqarluni.
Uummannami eqqaanilu inuussutissarsiornermi qaleralinniarneq sunniuteqaqigami. Ingerlatseqatigiiffiit pingasut tunitsiveqartitsipput suliffeqartitsillutillu. Taamaattumillu aamma oqaloqatigiinnerni sammineqarajuttut tassaapput tunisassiorfinni sulineq tamatumalu aaqqissuussaanera, minnerunngitsumik aamma allamiunik sulisoqarneq, nunaqqatinik sulisussaaleqilertarneq pillugu atorneqartoq.
Aammali pisortat suliffeqarfiini isumaginniffiusuni, minnerunngitsumik meeqqerivinni utoqqaallu illuanni, ajornartorsiutaasartut eqqaaqqajaanartinneqarput. Tamatumani pineqartut ilagaat piffissat suliffiusut pillugit malittarisassat aammalu sulisitsisut isumaqatigiissutinik tamalaanik ilisimasakippasittarnerat.
SIK-mit tikeraat marlukkuutaarlutik pingasukkuutaarlutilluunniit suliffeqarfinnut pulaarput, ilassilluarneqartarpullu. Uteraangamillu qanoq oqarnissaat tusarusunnallaaraaq. Oqaatigineqartut ilagaat suliffimmi pisortaasut sulisullu oqaloqatigiilluartarnerat qanoq pingaaruteqartigisoq. Maluginiarneqarsimavormi aalisakkeriviit ilaanni aalajangersimasumi sulisut qanoq qiimatigalutillu sulerusussuseqarpalutsiginerat, allanut sanilliullugu.
SIK-p siulersuisuuneri Uummannamiinnerminni nalinginnaasumik ataatsimiipputtaaq, taamalu aamma Sulinngiffeqarluni Angalanermut Aningaasaateqarfiup aamma Qaammarsaanermut Ilinniartitaanermullu Aningaasaateqarfiup siulersuisui ataatsimiillutik.
Ukiualuit matuma siornatigut siulersuisuunerit aalajangerput ukiumut ataatsimiittarnermik ilaat ataaseq sinerissap ilaani angalanerminnut atatillugu ingerlattarniarlugu, tassalu tikeraarnerminnut atatillugu suliffinnut pulaarniarlutik innuttaasunillu oqaloqateqarniarlutik. Taamaalillutik 2017-imi Tasiilamukarput, 2018-imi Qaanaamukarlutik 2019-imilu Nanortalimmukarlutik. Coronamik nappaalasoqalernera 2020-mi Uummannamukanngitsoorutigaat, ukioq mannali tassa tamatumunnga periarfissarsipput.
Uummannap sulluanut tikeraarnermi misigisanit assilisat ilamininngui: Illu sungaartoq tassa Uummannami sulisartut peqatigiiffiata allaffia. Assilisat matuma ataaniittut innuttaasunik ilaasortanillu (ilaatigut pisiniarfiup paarliani) oqaloqateqarnernit sulisartoqarnermilu peqatigiiffilerisunik ataatsimeeqateqarnernit pisuupput.
Kaajallaanermi uku tikinneqarput: Niaqornat, Uummannaq, Qaarsut, Ikerasak aamma Saattut. Angallatip drevianik aserortoorneq pissutigalugu Ukkusissat orninneqanngitsoorput.
