Kangaamiuni sulisartut peqatigiiffiat 2023-mi SIK-mi peqatigiiffitsialattut toqqarneqarpoq. Tamanna pivoq kattuffiup siulersuisuunerisa aalajangerneratigut.
”Peqatigiffitsialak”-mik toqqaaneq SIK-p iluani ukiumoortumik kajumissaatitut ingerlanneqartarpoq. Ilaasortaqarnikkut ineriartorluarnerup saniatigut tamatumani maluginiarneqartarput Ilaasortanik sullissilluarneq sammisassaqartitsilluartarnerlu. Aamma suliffeqarfinnut attaveqarluarniarneq, kattuffimmik suleqateqarluarneq minnerunngitsumillu sulisut sinniisoqarnerannik aallussilluarneq maluginiarneqartarput.
Kangaamiuni peqatigiiffimmut tunngatillugu tunngavilersuutigineqarpoq peqatigiiffiup kattuffiullu ukiuni kingullerni maligassaalluartumik suleqatigiissimanerat. Ilaasortaqassuseq ukiuni kingullerni aalajaatsumik inissisimavoq, peqatigiiffiup siulittaasuata sulilluarneratigut. Siulersuisut ataatsimiinnerinit imaqarniliat sukumiisuullutillu suliarilluagaasarput. Ukiumilu kingullermi kattuffimmit tikeraartoqarnerani maluginiarneqarpoq ilaasortat siulersuisullu suleqatigiilluartut. Tamakku siulersuisuunerit aalajangiinerminni tunngavilersuutigivaat.
Kangaamiuni sulisartut peqatigiiffiat SIK-p immikkoortortaqarfiisa pisoqaanerit ilagaat. Peqatigiiffik 1961-imi pilersinneqarpoq, taamalu 2021-mi marsimi ukiuminik 60-iliinera nalliussineqarpoq. ► Nalliuttorsiorneq tamanna pillugu allaaserisaq una toorukku atuarsinnaavat