Ulloq 14. marsi 2021 Kangaamiuni sulisartut peqatigiiffeqarneranni nalliussiviuvoq. Ukiummi 60-it tamatuma siorna ulloq taanna peqatigiiffik GAS-imut (ullumikkut SIK-mut) immikkoortortaasoq pilersinneqarpoq.
Kangaamiuni sulinermik inuussutissarsiuteqartut peqatigiiffiata siulersuisui unnummi nalliuttorsiorfiusumi. Saamerlerrmit: Kirsten Goleathsen, siulittaasup tullia Kitsia Petrussen, siulittaasoq Ulrik Lyberth, allatsi Bolethe Martinsen aamma Gertrud Rask V. Rosing.
Nunaqarfimmi sulisartut peqatigiiffiata 1961-imi aallartinnerani ilaasortat 19-iusimapput, tassa angutit 12-it arnallu 7-t. Peqatigiiffiup suliaasa siulliit ilagaat sulisut sinniisaannik marlunnik qinersineq.
Ullumikkut siulittaasuusoq Ulrik Lyberth nalliuttorsiummik oqalugiarnermini ataatsimiinnernit imaqarniliat siulliit najoqqutaralugit paasissutissaalluartunik saqqummiussaqarpoq.
Soorlu 1964-imi apriiliugaa unnukkut nal. 20 ilaasortat atuarfimmi ataatsimiisinneqarput GAS-ip pisortanik isumaqatigiissutaa nutaaq ”sulisartunut tamanut nassuiarneqassammat”.
Siulersuisut taamani ingerlatsinerminni atugarisaat ullumikkornit allaanerusimaqaat. Ataatsimiittarsimapput inissiap rækkehusip naqqata ataani, siulersuisunut ilaasortat ilaata suliffigisaani. Issiavissaqartarsimannginnamik iikkamut taliinnarlutik nikorfarmik siulersuisuni suliassatik ingerlattarsimavaat.
”Qujassuteqarumanngitsuunngilanga inuiaat kalaallit ukiut taama amerlatigisut matuma siornatigut sulisartoqarnikkut ataatsimoorfissaqarumallutik sulinialersimammata,” Ulrik Lyberth nalliuttorsiornermi oqalugiaammini oqarpoq. ”Nunaqarfitsinni peqatigiiffeqalerniarlutik suleqatigiissimasut aallarnersimasaat uagut kingulliarsuit ingerlapparput tunngavissilluarsimammatigut.”
GAS-ip (Grønlands Arbejder Sammenslutning) kingorna SIK-nngortup ukiut ingerlaneranni isumaqatiginninniartarnertigut sulinermi atugassarititaasutigut assigiinngitsunik angusaqartarsimanera siulittaasup eqqartorpaa. Soraarnerussutisiassanik aningaasaateqarfiup SISA-p pilersinneqarsimanera taasariaqarpoq. Aamma isumaginninnermut aningaasaateqarfiit ilaasortanut ilaqutaannullu pisariaqalerfiini iluaqutaasartut pilersinneqarsimasut taasariaqarput. Sulisartut peqatigiiffiisa kattuffiat isumaqatigiinniussisarpoq, kattuffiullu taassuma Ulrik Lyberthip oqarneratut ”ulluinnarni sulinermi paarisutullusooq ingerlaqatigivaatigut”.
Kangaamiuni nalliuttorsiorneq ulluni marlunni ingerlanneqarpoq: Ulloq nalliussiviusoq 14. marsi peqatigiiffiup allaffia tamanut ammavoq nunaqqatigiinnut kaffillerfiulluni. Tallimanngorneq 19. marsi ilaasortat qaaqqusallu unnussiuaarput nereqatigiillutik, erinarsoqatigiillutik minnerunngitsumillu qittallutik.
► Una tooruk Ulrik Lyberthip ullormi pisunik nalunaarusiaa oqalugiaataalu atuarumallugit
Sulisartut peqatigiiffii qanga pilersinneqarsimasut
SIK-p immikkoortortaqarfiisa ullumikkut 21-usut ilaasa qulit qangarpiaq pilersinneqarsimaneri allattugaatigaavut. Allattukkanut matuma ataaniittunut ilaanngitsut uunga nalunaarsinnaapput: Tina L. Nielsen tln@sik.gl imaluunniit sik@sik.gl
|
Qeqertarsuaq |
4. juuli 1954 |
|
Qaqortoq |
25. januaari 1946 |
|
Aasiaat |
10. oktobari 1953 |
|
Ilulissat |
19. septembari1953 |
|
Maniitsoq |
16. juuli 1953 |
|
Tasiilaq |
15. maaji 1964 |
|
Qasigiannguit |
4. aggusti 1956 |
|
Kangaamiut |
14. marsi 1961 |
|
Kangaatsiaq |
29. oktobari 1972 |
|
Upernavik |
10. aggusti 1956 |