Ukioq manna sulisut sinniisaasa pikkorissarnissaannut pilersaarut maanna kattuffiup nittartagaani atuarneqarsinnaalerpoq quppernermi uani: Pikkorissarnerit.
Pikkorissarnerit arfineq-pingasut pilersaarutaapput: Pikkorissarnerit tunngaviusut (Imm. 1) “Sulisut sinniisaasa akisussaaffiinik pisussaaffiinillu” sammisaqarfiusut tallimat pikkorissarnerillu nangissutaasut pingasut (Imm. 2) ”Sulisoqarnermi inatsisinik isumaqatigiinngissutinillu aaqqiiniartarnernik” sammisaqarfiusut.
Ullumikkut SIK-p isumaqatigiissutai tunngavigalugit sulisuusut sinniisaat 360-ingajaat nunami tamarmi qinikkatut atuuffeqarput. Pikkorissarnerillu SIK-p qaammarsaanermut ilinniartitaanermullu aningaasaateqarfianit neqeroorutigineqartartut sulisut sinniisaasa taakkua suliaminni nukittorsarneqarnerannut pingaaruteqarluinnarput.
Peqataaniarnermi ilisimasariaqakkat
Immersugassat peqataaniarluni nalunaarfissat pikkorissarnissanut pilersaarummi aaneqarsinnaanngorlugit ilanngunneqarsimapput.
Peqataaniarluni nalunaarfissamik immersuinermi sulisitsisup suleqatigilluarnissaa pingaaruteqarpoq – tassa ilaatigut pikkorissartussaq pikkorissarnermi nalaani akissarsiaqaannassanersoq angerlugu naaggaarluguluunniit akineqartussaammat
Aammattaaq pingaaruteqarpoq ilisimassallugu ukiuni kingullerni tallimani Imm. 1-imut aamma Imm. 2-mut peqataasimanngikkaanni aatsaat pikkorissarnernut taakkununnga peqataanissamik qinnuteqartoqarsinnaammat.
Pikkorissarnissat allat
Sulisut sinniisaannik pikkorissaasarnerit SIK-p qaammarsaanermut ilinniartitaanermullu aningaasaateqarfiata (QIA-p) aningaasalersugaasa ingerlataasalu pingaarnersaraat.
Taakkua saniatigut kattuffimmut attaveqaatit ulluni pingasuni pikkorissarnissaat januaarip naalerneranut/februaarip aallartinneranut pilersaarutaavoq.
Isumasioqatigiinnissat pikkorissaanerillu immikkut ittut makku aamma pilersaarutaapput: Royal Greenlandimi sulisut sinniisaat (aalisakkeriveqarfissuaq suleqatigalugu aaqqissuussaq), sulisoqarnermi inatsisit (Kommuneqarfik Sermersooq aamma Avannaata Kommunia suleqatigalugit) kiisalu akkordernernik naatsorsuisarneq (GE (Grønlands Erhverv) suleqatigalugu).
Taasariaqarportaaq peqatigiiffiit siulersuisui kattuffilerinermik sivikitsumik pikkorissarneqartussaammata kattuffiup siulittaasuata tulliata Jokum Zeebip SIK-p allattoqarfiani siunnersortimik aappaqarluni peqatigiiffinnut kaajallaanissaa iluatsillugu.
Pikkorissaanerit pillugit attavigisassaq: Inge-Marie Rosing, tlf. 32 21 33, e-mail inro@sik.gl