Akiliunneqarluni sulinngiffeqarluni angalanernut maleruagassat

Feriefondip siulersuisuisa ulloq 8. maaji 2023 ataatsimiinnerminni feriefondimit ukioq allortarlugu akiliunneqartarnissamut najoqqutassiat uku aalajangiuppaat:

1. Feriefondi sulisunut akiliunneqarnissaminnut pisinnaatitaasunut akiliussisalersinnagu aningaasat naammattut pigineqartariaqarput. Taamaattumik feriefondip akiliussi­sarnerii siusinnerpaamik ulloq 1. apriili 2024 aallartissinnaapput (isumaqati­giis­su­tip atuutilerfianit ukiut marluk qaangiunneranni).

2. Feriefondi angalanissanut aninngaasaliisarpoq pisortat suliffeqarfiutaanni atorfininnermit sivikinnerpaamik ukiuni marlunni ataannartumik tamatumunnga katersisimagaanni. Ukiut katersiffiusut marluusut iluanni pisortani atorfimmut allamut nuunnermi sap. ak. 6 tikillugit katersinngitsoorsimagaanni taman­na qaqugu ani­nga­lanissamut akiliunneqarnissap naatsor­sorneranut sunniuteqassanngilaq.
3. SIK-p allattoqarfia pisariaqartutigut misissuissaaq qinnuteqartup akiliunneqarnissaanut piumasarisat naammassineqarsimanersut, soorlu qinnuteqartoq qinnute­qar­­nermini atorfim­mi feriefondimit akiliunneqarnissamut pisinnaatitaaffiliisumi atorfeqarnersoq kiisalu ukiuni marlunni katersereersimanersoq.
4. Akissarsiaqarani orloveqarluni sulinngikkallarneq piffissamut katersiffiusumut ilanngunne­qartussaanngilaq.
5. 2024-mi angalanissamik SIK-mut qinnuteqarneq siusinnerpaamik ulloq 1. decembari 2023 SIK-p allattoqarfianut nassiunneqarsinnaalissaaq. Qinnuteqaat ulloq aallarfissatut kissaa­tigisaq kingusinnerpaamik qaammatinik 3-nik sioqqullugu SIK-mit tiguneqarsimassaaq.
6. Taamaallaat SIK-p nittartagaatigut qinnuteqartoqarsinnaassaaq.
7. Qinnuteqarnermi suut uppernarsaatitut ilanngunneqassanersut SIK-p allattoqarfiata aalajangissavaa.

8. Qinnutigineqarsinnaavoq Københavnimut utimullu angalanissaq økonomiklassemi (akikinneq allanngortinneqarsinnaanngitsoq). Bilitsimut akisunermut qaffatsitsiniaraanni akisunerussutaalersoq nammineq akiligassaassaaq. Angalanernik aaqqis­suussinerit pissutigalugit aqqutaani unnuinissaq pisariaqassappat tamanna Ferie­fondip akilissavaa.
9. Kalaallit Nunaanni angalanissaq aammattaaq qinnutigineqarsinnaavoq. Bilitsi akikinneq allanngortinneqarsinnaanngitsoq Feriefondip tamakkiisumik akilissavaa, Kalaallit Nunaata ilaanut sumulluunniit. Angalanernik aaqqissuussinerit pissutigalugit aqqutaani unnuinissaq pisariaqassappat tamanna Feriefondip akilissavaa.
10. Timmisartumut bilitsimik inniminniinermut ilagitillugu angalanissaraluamik taamaatitsinermut sillimmasiissummik inniminniisoqassaaq.
11. Ukioq allortarlugu feriefondimit akiliunneqarluni angalanermi peqataasinnaapputtaaq aapparisaq ima­luunniit inoo­qa­ti­gi­saq – kiisalu qinnuteqartup qitornai ima­luun­­niit aapparisap/inooqa­ti­gi­sap qitornai ul­lormi aallarfissami 18-inik ukioqalersimassanngitsut, akiliunneqarluni angala­sinnaatitaa­sup inoqutaanut ilaagunik. Inoo­qatigisaq inunnik nalunaarsuiffik naapertorlugu najugarisami sivikinnerpaamik ukiumi ataatsimi najugaqatigisimasariaqarpoq akiliunneqarluni angalanissamut peqa­taasinnaassaguni.
12. Qitornavissiat 18-it inorlugit ukiullit meeqqallu 18-it inorlugit ukiullit allakkatigut aku­erisaasumik paaqqutaralugit najugaqatigisat taamatuttaaq akiliunneqarluni angalanissamut peqataasinnaapput.
13. Ilaqutariit ataatsimoorlutik angalassapput. Qitornarli atuariartortussaq angerlarsimaffigisamit Københavnimut anga­laqatigineqarsinnaavoq siumuinnaq bilitseqartillugu. Taassuma angerlarnissaa nammineq akiligassaavoq.

14. Akiliunneqarluni angalasinnaanermut tunngatillugu piumasarineqarpoq tamatuma ki­ngor­na suliffigisamut uternissaq.
15. Feriefondimit akiliunneqarluni angalasinnaaneq piffissap katersiffiusup naaneranit qaammatit 23-t qaangiutsinnagit atorneqassaaq, taamaanngippat atorsinnaajunnaassammat. Tamatuma kingorna akiliunneqarluni angalasinnaaqqilertoqassaaq aatsaat malittarisassat atuuttut naapertorlugit tamatumunnga pisinnaatitaaqqileraan­ni.
16. Piffissap katersiffiusup nalaani sulisoq aapparisami imaluunniit sivikinnerpaamik ukiumi ataatsimi najugaqatigalugu inooqatigisami SIK-p feriefondianit imaluuunniit feriefondimit allamit akiliunne­qar­luni ima­luun­niit makitaalluni angalasinnaanera atorlugu angalaqataappat, taassuma SIK-p feriefondianit angalanissamut akiliunneqarsinnaatitaanera atorunnaassaaq, apeqqutaa­nani aapparisaa/inooqati­gisaa pisortani imaluunniit namminersortuni sulisuunersoq.
17. Sulisoq 2023-mut atuuttumik angalanissamut makitaasimaguni, 2024-mi feriefondimit ukioq allortarlugu atuuttumik angalanissamut akiliunneqarsinnaavoq taa­ma­tut akiliunneqarsinnaanermut piumasarisaasut eqqortikkunigit.