SIK-p 24-ssaanik ataatsimeersuarnerani ulluni 29.-31. oktobari 2025 pisumi aalajangiinernik imaqarniliaq sapaatip-akunnerani qaangiuttumi nassiunneqarpoq – taamaalillutillu kattuffiup iluani susassaqartut tamarmik suut oqallisigineqarlutillu aalajangiivigineqarsimanerannik eqqaamassutissinneqarput. Imaqarniliaq quppernerup matuma ataani aaneqarsinnaavoq. Taamatullu aamma kattuffiup malittarisassai iluarsisat tassani aaneqarsinnaapput.
Kikkut siulittaasutut, siulittaasup tulliatut siulersuisuunernullu ilaasortatut qinigaanersut ataatsimeersuartoqareernerani apeqqutigineqarajunnernut ilaasarput. Taakkulu nalunaarutigineqarput tusagassiorfinnut nalunaarummi ataatsimeersuarneq naammassiniariartoq nassiunneqartumi – una tooruk
Allaaserisami uani suut oqaluuserineqartut aalajangiiffigineqartullu tigulaariffigineqarput.
SIK-p Inuusuttai atorunnaarput
Kattuffiup aaqqissuussaaneranut tunngatillugu maluginiarneqarnerpaanut ilaavoq SIK-p Inuusuttaasa kattuffimmi immikkoortortatut atorunnaarsinneqarnerat.
Tamatumunnga pissutigineqartoq erseqqippoq: Sulisartut peqatigiiffiini siulersuisoqarneq inuusunnerusunit tiguneqariartuaalersimagaluartoq 2013-imi inuusuttunut immikkoortortaqarfeqalersimaneq takorloorneqartutut atsigisumik ilaasortanik inuusunnerusunik pissarsissutaasimanngilaq.
Peqatigiiffimmik inuusuttunut immikkoortortaqarfeqarnermut taarsiullugu siunissami inuusuttunut suliniutissat allatut ingerlanniarneqalerput. Inuusuttut siunissami kattuffimmik ingerlatitseqqittussat ullutsinni ”mobiiliniipput”, imaappoq internettikkut periarfissanik ujaasillutillu atuisorujussuupput. Tamannalu tunngavigalugu periusissiortaqassaaq.
Ikinnerpaamik 35-nik ilaasortarnissaq aalajangiusimaneqarpoq
Ukiut ingerlaneranni oqaluuserineqartarpoq SIK-mi sulisartut peqatigiiffii peqatigiiffittut ingerlanneqaannassagunik, namminneq siulersuisoqarlutik ilaasortallu akiliutissaannik namminneq aalajangersaasarlutik, ikinnerpaamik qassinik ilaasortaqassanersut.
Illua’tungaatigut sumiiffinni peqatigiiffeqarnerup pingaaruteqarnera illua’tungaatigullu kattuffimmi ingerlatsinerup pisariillisarneqarnissaa oqimaalutaralugit tamanna nalilersuiffigineqartarpoq. Taamalu ataatsimeersuarnermi aalajangiunneqarpoq illoqarfimmi nunaqarfimmiluunniit SIK-mut atasumik peqatigiiffeqassagaanni taassuma ikinnerpaamik 35-nik ilaasortaqarnissaanik aalajangersagaq attatiinnarneqassasoq.
Taamaalillutik siulersuisuunerit siunnersuutigisimasaraluartik, tassa ilaasortat ikinnerpaamik 50-iunissaat, tunuartiinnarpaat malugigamikku sumiiffinni peqatigiiffeqarneq annaajumanagu ilaasortat ikinnerpaamik 35-unissaat amerlanerpaanit kissaatigineqartoq.
Aallartitaqarneq nalilersoqqinneqassaaq
Kattuffiup aaqqissuussaaneranut tunngasoq alla oqaluuserineqartoq tassaavoq peqatigiiffiit ataasiakkaat qassinik Nakkutiliisoqarfimmut aamma Ataatsimeersuarnermut taasisinnaatitaasunik aallartitaqartarnerat. Ullumikkut ima amerlassusilerneqartarput:
- Ilaasortat 35-nit 250-inut: Aallartitaq 1
- Ilaasortat 251-init 500-nut: Aallartitat 2
- Ilaasortat 501-init 750-inut: Aallartitat 3
- Ilaasortat 751-it amerlanerusullu: Aallartitat 4
Peqatigiiffiup angisuup (Nuummiittup) peqatigiiffiullu minnerup (Nanortalimmiittup) siunnersuuteqarnerisigut aalajangiunneqarpoq ataatsimiisitaliortoqassasoq tamatumani qanoq aaqqissuusseqqissinnaanermik siunnersuuteqartussamik, pingaartumik peqatigiiffiit minnerit ataasiinnaajuaannartumik aallartitaqartarnerat ippigineqarmat.
Ataatsimiisitaliaq pilersinneqartussaq Nakkutilliisoqarfiup tullianik ataatsimiinnissaani, tassa 2026-mi aasakkut, ilisimatitsiumaarpoq qanoq isumaliuteqarnerminnik.
Soraarnerussutisiallit pisinnaatitaaffii
Kangaamiuni sulisartut peqatigiiffiata kissaatiginartippaa soraarnerussutisiallit peqatigiiffimmut ¼-imik akiliuteqarlutik ilaasortaasut suliffeqartutulli pisinnaatitaaffeqarnissaat.
Pisinnaatitaaffiit eqqarsaatigineqartut ilagaat Isumaginninnermut Aningaasaateqarfimmut qinnuteqarsinnaaneq. Tamatumani ilisimatitsissutigineqarpoq soraarnerussutisiallit ilumut allatulli pisinnaatitaaffeqanngitsut, tassami aningaasaateqarfimmut qinnuteqarsinnaaneq sulisitsisorisap aningaasaateqarfimmut akilersueqataaneranik tunngaveqarmat.
Imaappoq: Soraarnerussutisiallit SIK-mut ilaasortaasut saniatigut suliffeqarunik Isumaginninnermut Aningaasaateqarfimmut qinnuteqarsinnaapput sulisitsisortik aningaasaateqarfimmut akilersueqataappat.
Naatsorsuutit ilaasortaanermullu akiliutit
SIK-p sulisartut kattuffiattut ukiunut sisamanut naatsorsuutai ilisimatitsissutitut saqqummiunneqarput – tassami siulersuisuunerit naatsorsuutinik akuerinninnissaminnut oqartussaatitaammata. Kattuffimmut ilaasortat akiliutaata maannamut atuuttup allanngortinneqarnissaanik siunnersuuteqartoqanngilaq.
Kattuffiup aningaasaqarnera kusanarnerarlugu siulittaasoq unnersiorpoq – toqqarlugillu aningaasaqarnermut akisussaasoq allattoqarfimmilu pisortaq nersualaarpai aningaasaqarnerup ajunngitsumik ingerlanissaanik isumaginnilluarsimammata. Ataatsimeersuartullu ersaartaapput.
► Una tooruk aalajangiinernik imaqarniliaq aajumallugu
► Una tooruk malittarisassat nutartikkat aajumallugit