Asseq: SIK-p siulersuisuunertaavi. Saarliit: Siulittaasoq Jess G. Berthelsen, siulittaasup tullia Sofie Svendsen. Tunorliit saamerlermit: Jens Nuka Poulsen, Benjamin Kielsen, Pualuna Kivioq, Ane-Marie Havmøller-Jørgensen, Qulutannguaq Berthelsen, Else Jonna Lange aamma Nuunu Jerimiassen.
SIK-p sulisartut kattuffiattut 24-ssaanik ataatsimeersuarnera ullumi naggaserneqarpoq siulittaasumik, siulittaasup tullianik siulersuisuunernullu ilaasortanik allanik qinersinermik.
Jess G. Berthelsen unammillerteqarani siulittaasutut qinigaaqqippoq. Taanna ataatsimeersuarnissaq aqaguttoq ilasseqatigiissutigineqarpoq siulittaasutut ukiut 35-nngorsimammagit, nalinginnaanngilluinnartumik. Siulittaasullu tulliatut qinerneqarpoq Sofie Svendsen, SIK-p Nuummi peqatigiiffiani siulittaasuusoq.
Siulersuisuunernut ilaasortat allat tassaalerput: Benjamin Kielsen (Narsaq), Qulutannguaq Berthelsen (Nuuk), Jens Nuka Poulsen (Tasiilaq), Nuunu Jerimiassen (Aasiaat), Pualuna Kivioq (Qaanaaq), Else Jonna Lange (Ilulissat) aamma Ane-Marie Havmøller-Jørgensen (Upernavik).
SIK-p Inuusuttai immikkoortortatut atorunnaarput
Kattuffiup malittarisassaani allannguutit aaqqissuussaanermut tunngasut arlallit akuersissutigineqarput. Malunnaateqarnerpaaq tassaavoq SIK-p Inuusuttaasa malittarisassani allassimajunnaarnerat. Tassa imaappoq taakku kattuffimmi immikkoortortatut atorunnaarput.
SIK-p Inuusuttai 2013-imi pilersinneqarput inuusuttunik ilaasortaqarnerulernissaq taakkualu sulisartut peqatigiiffeqarneranni akuunerulernissaat siunertaralugit. Tamannali siunertaasutut sunniuteqarsimanngilaq. Taamaattumik peqatigiiffeqarneq nalinginnaasoq atornagu allatut inuusuttunut suliniuteqarnissaq siunniunneqarpoq – tassa qarasaasiatigut attaveqatigiinnissamut periarfissat nutaat atorlugit aammalu socialmediatigut suliniuteqarnikkut.
Nalunaarut tamatigooqisoq
Ataatsimeersuarneq qaammammik ataatsimik sioqqullugu nassiunneqarpoq SIK-p siulersuisuunerisa nalunaarutaat sukumiisorujussuaq, tassani kattuffeqarnermut tunngasut inuiaqatigiinnilu pissutsit allaaserineqarlutik.
Siulersuisuunerit nalunaarutaanni ilaatigut makku sammineqarput: Siulersuisuunitoqqat kattuffeqarnikkut suliniutaat, kattuffinnik allanik suleqateqarneq, kattuffiup aningaasaateqarfiini (Socialfondini Feriefondimilu) iliuutsit, suliffeqarniarnermi pissutsit, akit qaffakkiartornerat, inuiaqatigiinni atugarissaarnerunissamik kissaateqarneq, aalisakkanik nalittorsaanissaq kiisalu nuna tamakkerlugu pilersaarusiornermi siunissamut ungasinnerusumut isiginissaq ataqatigiissaarinerunissarlu.
Naggataatigut inuiaqatigiinni ataatsimoornerunissaq kajumissaarutigineqarpoq – ataatsimoornissaq aatsaat taama pisariaqartigilermat. Tamatumani pineqarpoq Kalaallit Nunaata nunat tamalaat akornanni toqqissisimananngitsumik inissisimalersoorsimanera, Amerikarmiut præsidentiata Trumpip nunatsinnik pileritsaassinerata kingunerisaanik.
► Una tooruk siulersuisuunerit nalunaarutaat anillatsikkumallugu