Nuummi sulisartut peqatigiiffianni (NSIP) siulittaasup Peter B. Mølgaardip Nuummi politikkikkut suliaqartunik sulisartoqarneq pillugu oqaloqatiginnittarnini suli ingerlappai.
Qanittukkullu ataatsimeeqatigaa borgmester Avaaraq S. Olsen (Inuit Ataqatigiit). Qulequttat marlussuit oqaloqatigiissutigineqarput.
Oqaloqatigiissutigineqartoq siulleq tassaavoq NSIP kommunilu suleqatigiillutik sulisitsisunikpikkorissaasinnaanerat, sulisoqarnermi inatsisinik isumaqatigiissuteqartarnermillu paasisaqartitsinerunissaq siunertaralugu, aammalu sulisut sinniisaasa sulisitsisullu suleqatigiinnerusinnaanerat anguniarlugu.
Oqaloqatigiissutigineqartut aappaat tassaavoq NSIP-mit maluginiarneqartartoq, tassa nunatsinni aammalumi Kommuneqarfik Sermersuumi takornartaajunnaarsimasoq SIK-mut ilaasortat AK-mut nuunniarneqartarnerat. Aammami SIK-mut ilaasortat ilaat isumaqartaramik AK-mut nuukkunik aningaasarsiatigut atugarissaarnerulissallutik.
”Kisianni tamanna ilumuunngilaq,” Peter B. Mølgaard taama borgmesterimut erseqqissaavoq, nangillunilu: ”Maannami aningaasarsiatigut SIK-mi ilaasortavut pitsaanerusumik atugaqalerput. Sulisut peqatigiiffiannut allamut taaneqartumut nuunnermi aamma annaaneqartartut makkuupput: 100%-imik akiliunneqarluni feriefrirejseqarsinnaaneq sulisut ilaannut aalajangersimasunut tunngasoq. Aamma socialfondimit neqeroorutaasut assigiinngitsorpassuit soorlu makku: Isaruartaarnissamut tapertinneq, tassani aamma meerarisat 18-t inorlugit ukiullit ilanngullugit, qanigisamik napparsimasoqartillugu Danmarkimut katsorsartikkiartortoqartariaqarpat ingiallortaaneq, toqukkut qimagunnermi illerfiup/qummuartap angallanneqarnera il.il.”
Borgmester Avaaraq S. Olsen tamanna misissorniarlugu neriorsuivoq, paasisaqariarunilu NSIP uterfigissallugu neriorsuilluni. NSIP-p siulittaasua borgmesterilu isumaqatigiipput ukiup affakkaarlugit ataatsimeeqatigiittarniarlutik, tullianilu ataatsimeeqatigiinneq NSIP-p allaffiani ingerlanneqarumaartoq.