SIK-p siulersuisuuneri qaammammi uani Bruxellesimiipput, Europamiut kattuffiata EU-p qullersaqarfiani. Tassunga angalanermi siunertaavoq EU pillugu ilisimasassanik qanimut pissarsinissaq, taamaalilluni SIK Kalaallit Nunaata EU-mut attaveqarnera pillugu oqalliseqataanissamut tunngavissarissaarneruniassammat – europamiut kattuffiannik taassuminnga suleqatiginninnerulersinnaaneq aamma eqqarsaatigalugu.
EU-mi ingerlatsiviit assigiinngitsut ataatsimeeqatigineqarput, EU-kommissionip nunanik tamalaanik suleqateqarnermut immikkoortortaqarfia EU-p alliartorneranik sammisaqarfiusoq aamma EU-mut ilaasortat ministereqatigiivisa inatsisilerinikkut kiffartuussiviat.
Taamatuttaaq Bruxellesimi Kalaallit Nunaata sinniisoqarfia pulaarneqarpoq, tassani ningiuusoq Tove Søvndahl Gant paasissutissiilluni sinniisoqarfiup qanoq sulineranik – taamatullu aamma EU-p inatsisartuini Danmarkimit ilaasortaasut ilaat Villy Søvndal paasissutissiiffiusumik ataatsimeeqatigineqarluni.
Siulersuisuunerit aammattaaq periarfissarsipput Danmarkimi sulisartut kattuffiisa suleqatigiiffiata FH-p Bruxellesimi immikkoortortaqarfianik ataatsimeeqatiginninnissaminnut. Imaallaallu tamanna paasisaqarfiuvoq EU-mi aalajangiisartut EU-mi sulisartoqarnermut suliffeqarnermullu tunngatillugu politikkiannut sunniiniartarnerup qanoq ingerlanneqarneranik.
