Septembarimi sapaatip-akunnerani kingullermi Nuummi Paamiunilu SIK-p isumaqatigiissutai tunngavigalugit sulisuut sinniisaat 33-t Nuummi isumasioqatigiissinneqarput.
Isumasioqatigiinneq pivoq Hotel Hans Egedemi ulluni pingasuni.
Saqqummiussat arlalissuupput, ilaatigut SIK-p allattoqarfianit isumaqatigiissutit nutarterneqarneri, sulinngiffeqarluni angalanernut aningaasaateqarfik kiisalu isumaginninnermut aningaasaateqarfiit pillugit paasissutissiisoqarluni, taamatullu aamma Sullivinnik Nakkutilliisoqarfimmit aamma soraarnerussutisiassaqarfimmit SISA-mit saqqummiussisoqarluni.
Aamma psykologimik oqalugiartoqarpoq, sulisunut sinniisuunerup tarnip pissusaasigut unamminiarnartorisinnaasai nassuiarneqarlutik.
Soorunami aamma sulisut sinniisaasa, sulisitsisut sulisartullu kattuffiata akornanni pissutsit sammineqarput qulequtaralugu: Sulinermi atugassarititaasut qanoq pitsanngorsarsinnaavavut?
Quppernermi matumani assit: Isumasioqatigiinermi assilisat.
