Ilaasortanngorit

Ilaasortanngorneq pisariitsuuvoq

Toortagaq "Ilaasortanngorit" tooruk: Taava ilaasortanngornermi immersugassaq nanissavat. Aamma takuuk immikkoortortaqarfik sorleq attavigissanerit qanorlu ilaasortaanermut akiliisassanersutit (ilaasortaanermut akiliutit illoqarfimmit illoqarfimmut assigiinnginnamik).

  • Aamma SIK-mut ilaasortanngorsinnaavutit suliffinni sinniisut imaluunniit SIK-p immikkoortortaqarfia attaveqarfigalugu ilaasortanngornissamullu immersugassaq immersorlugu. 
  • PBS aqqutigalugu ilaasortaaninnut akiliuteqartassaatit.
  • Ilaasortaanermut akiliut akileraarnermut ukiumoortumik nalunaarusiornermi ilanngaatigineqarsinnaasarpoq.

SIK-mut ilaasortaanerup iluaqutissartai

Kattuffimmut angisuumut ilaasortaaneq arlalippassuartigut erseqqissunik iluaqutissartaqarpoq. SIK-mut ilaasortaaguit: 

► Ilinniarsimasunik misilittagalinnillu ikiortissaqarlutillu siunnersortissaqassaatit

► Atugarisavit assinginik atugaqartut inuit naapissavatit

► Suleqatit allat tuusintillit tapersersortigissavatit

► Suliannut tunngasutigut sunniuteqarnerussaatit

SIK-p isumaqatigiissutit atorfeqarninnut tunngaviusut isumaqatigiinniutigisarpai, illillu ilaasortatut iluaqutissat tamaasa pissarsiarissavatit sunneeqataanissamullu periarfissaqalerlutit – toqqaannartumik imaluunniit sulisut sinniisaat SIK-llu immikkoortortaqarfia aqqutigalugit.

Isumaqatigiissutit pillugit siunnersorneqarneq

Akissarsiat, feeria, suliffinni atugarisat avatangiisillu, pisinnaatitaaffitit allarpassuillu pillugit paasisimasalinnit siunnersorneqassaatit. Illit illoqarfinni imaluunniit nunaqarfinni aamma nuna tamakkerlugu suliffeqarneq SIK-mi ilisimaarilluarpavut.

Isumannaannerunissaq

SIK-mi atorfeqarnermi atugarisat pillugit, akissarsiatigut, napparsimanermi, soraarsitaanermi aamma suliffissaaleqinermi isumaqatiginninniarnikkut isumannaannerusumik inissisimassaatit. Siunnersorneqarnermik, tapersersorneqarnermik aamma attaveqaqatigiinnermik neqeroorfigaatsigit.

Pikkorissarsimasunik sinniisoqarneq

Nunatsinni akissarsiat suliffeqarnermilu atugarisat pitsaanerulersinniarneqarneranni peqataanissannut SIK-mi periarfissaqarputit. Anguniakkat tamakku ulluinnarni ingerlanneqartarput suliffinni tamalaani sulisut sinniisaat qanimut suleqatigalugit. Illit sulisut sinniisaannik qinerseqataasinnaavutit. SIK-milu pingaartillugit ingerlanneqartarput sulisut sinniisaannik pikkorissaanerit sungiusaanerillu, taamaalillutik illit suliffinni soqutigisannik pitsaasumik sulissutiginnissinnaaniassammata pisariaqartitsileraangavillu ajunngitsumik tapersersortarsinnaaniassammatsit.

Kiffartuunneqarneq

SIK-mut ilaasortaanikkut sullinneqassaatit siunnersorneqarlutillu SIK-p aningaasaateqarfiinut qinnuteqaateqarnissamut, soorlu Sulinngiffeqarluni Angalanermut Aningaasaateqarfimmut, tassani feeriarluni angalanissamut akiliunneqarnissamut periarfissaqarmat. Illit qanigisat perululluni napparsimalerpat Isumaginninnermut Aningaasaateqarfimmit ikiorneqarnissamik qinnuteqarsinnaavutit. Makku qinnuteqaatigineqarsinnaapput: Sulinngikkallarnermi isertitatigut annaasaqaatit matussuserneqarnissaat, ineqarneq, angalanissamut aningaasartuutissat aamma qanigisap ilerrata  angerlaanneqarnissaa.