PAASISSUTISSIINEQ: SIK-mut ilaasortat ilarpassui ulluni qaninnerpaani sms-ikkut ilisimatinneqassapput 1. apriili 2022-mit ilaasortaanermut akiliutaat qaffaateqassasut. Ilaasortalli allarpassuit tamatut sms-isinngillat – tassa akiliutaat allannguuteqassanngimmata.
Tamanna pissaaq 2021-mi septembarimi SIK-p kattuffittut ataatsimeersuarnerani ilaasortat akiliutaannut tunngatillugu aalajangiinerisa kingunerisaannik. Kattuffiup siulittaasuata tulliata Jokum Zeebip peqatigiiffiit SIK-mut atasut 20-t decembarimi allaffigai aalajangiinernik taakkualu imarisaannik eqqaasitsissuteqarluni. Maannalu 2022-p aallartisimalernerani eqqaasitseqqittoqartarpoq allakkatigut telefonikkullu. Aamma siulittaasup tulliata peqatigiiffiit qinnuigai ilaasortat akiliutaannik allanngortitsissagunik tamanna kingusinnerpaamik 5. marsi 2022 SIK-mut nalunaarutigeqqullugu.
Allannguutit kattuffiup ataatsimeersuarnerani akuersissutigineqartut ilagaat ilaasortat ataasiakkaat ilaasortaanermut qaammammut akiliutaannit kattuffiup agguagarsiassai 15 kr.-inik ilaneqassasut 150 kr.-init 165 kr.-inut, 2022-mi apriilip aallaqqaataanit atuutilersussamik. Taamatut qaffaanissaq pissaaq kattuffiup allattoqarfiani ilaasortanik sullissinikkut suliassat amerliartornerat malinnaaffigilluarsinnaajumallugu.
SIK-p aaqqissuussaanera maannamut atuuttoq malillugu ilaasortat akiliutaannit peqatigiiffiit agguagarsiassaat kattuffiup ataatsimeersuarnerani aalajangersarneqarsinnaanngillat. Tamanna peqatigiiffiit namminneq aalajangigassaraat. Taamaattumillu kattuffiup iluani akiliutit nunami tamarmi assigiinngillat.
Taamaattumik septembarimi kattuffiup ataatsimeersuarnerani peqatigiiffiit kajumissaarneqaannarsinnaasimapput agguagarsiassaminnik taamatuttaaq 15 kr.-inik appaaqqullugit, taamaalilluni ilaasortat ataasiakkaat akiliutaasa tamarmiusut qaffannissaat pinngitsoortinneqarsinnaaniassammat.
Maanna allanngortitsinissamut sap. ak. marluinnanngorneranni paasinarsivoq aaqqiissutiginiarneqartut sisamanngorlugit immikkoortiterneqarsinnaasut:
1) Kattuffiup ataatsimeersuarnerani kajumissaarut peqatigiiffiit ilaasa tamakkiisumik malinniarpaat, taamalu akiliutit allanngussanatik (Qaqortumi, Nuummi Tasiilamilu),
2) Kattuffiup ataatsimeersuarnerani kajumissaarut tamakkiisuunngitsumik ilaasa malinniarpaat, taamalu akiliutit qaffaateqassallutik (Ilulissani, Qasigiannguani, Nanortalimmi Upernavimmilu),
3) Kattuffiup ataatsimeersuarnerani kajumissaarut ilaasa malinnianngilaat, taamalu akiliutit 15 kr.-inik qaffassapput. Tamanna illoqarfinni nunaqarfinnilu ukunani peqatigiiffinnit nalunaarutigineqarpoq: Sisimiut, Aasiaat, Kangaamiut, Kangaatsiaq, Maniitsoq, Uummannaq, Kangerlussuaq aamma Qeqertarsuaq.
4) Peqatigiiffiit allat ullup kingusinnerpaamik nalunaarfigeqqusap nalliunnerani nalunaaruteqarsimanngillat ilaasortat akiliutaat pillugit qanoq aalajangiussaqarsimanerminnik – taamalu taakkunani akiliutit 15 kr.-inik qaffassapput.