Ilinniartut ineqarfii piaarnerpaamik aaqqiivigineqarlik!

SIK-p Inuusuttaasa pingaartippaat suleqataaffigissallugu ilinniartut tamarmik ineqarniarnikkut pitsaasumik atugaqarnissaat (SIK-p Inuusuttaanit oqaaseqaat).

Qaqortumi ilinniartut ineqarfiit peqqinnanngilluinnartut nalaappagut, taakkualu oqussimaqisut aammalu aserfallassimaqisut takuneqarsinnaapput.

Allaammi ineqarfiit ilaanni emhæt atorneqaqqusaajunnaarsimapput ineqarfiup ikuallariaannaanera peqqusiullugu. Nateq aserfallassimaqisoq aamma ineqarfianni nalaarparput, alloriusat tamarmik aalasut, kikiaat nuisaannartut, fodlistit qangattarsimallutik anorimik isaavigineqaannalersimasut, allaammi ima ajortigipput isiinnarlugu silaannaq peqqinnanngilluinnartoq malunnarluinnarpoq. Ilinniartut ineqarfimminni atortussaqartinneqannginnertik pissutigalugu namminneerlutik isumagisarsimavaat.

Ilinniartitaanermut, kultureqarnermut ilageeqarnermut naalakkersuisup siumumeersup eqqummaariffiginerusariaqalerpai ilinniartut qineqqusaarutaannaasarsinnaanngimmata.

Kollegieliornerit aallartinneqarsimanera nipangersaataannartut atorneqarsinnaanngillat, ilinniartummi ilaannai kisimik kolligienut nutaanut inissittarput sinnerilu atugassarititamikkut pittanngorsaavigineqassanatik.

SIK-p Inuusuttaasa pingaartippaat suleqataaffigissallugu ilinniartut tamarmik ineqarniarnikkut pitsaasumik atugaqarnissaat.

SIK-p Inuusuttaasa siulittaasuat
Jens Ole Næsgaard Madsen