Ilulissani Sulinermik Inuussutissarsiuteqartut Peqatigiiffiata ilaasortai amerliartuinnarput – maannalu 700 sinneqalerput. Tamanna peqatigiiffiup siulittaasuata Else Jonna Villadsenip siulersuisooqataasalu, minnerunngitsumillu sulisut sinniisaasa, soorunami nuannaarutigaat.
Sapaatip-akunnerani kingullermi siuariartorneq tamanna suli kaamisarumallugu Brugsenip isaariaani aaqqissuussisoqaqqippoq paasisitsiniaanermik ilaasortassarsiornermillu. Quppernermi maani assilisat pisimasumit tassanngaanneersuupput.
Tassani pisarnertut nerriviliisoqarpoq, tassunga iliorarneqarlutik naqitaaqqat SIK pillugu aammalu isumaginninnermut aningaasaateqarfiit pillugit paasissutissartallit – minnerunngitsumillu agguaanneqarput ussassaarutit alutorineqartartut assigiinngitsut soorlu pisiniarfiliartaatit ninngusuut, inukkat, ballonit, ukusartut, kuglepenit, qungasequtit, tyggegummit sukkuaqqallu.
”Isaasunit ilassilluarneqarput, piffissallu ilaani apeqqutit aamma paasissutissallu avitseqatigiissutigineqarmata nal. ak. 1½ ingerlanerani ilaasortanngortut arfineq-pingasuupput,” Else Jonna oqaluttuarpoq.
Sulisut sinniisaasa siunniuppaat sulisartut ulluanni maajip aallaqqaataani sila ajunngeriarpat silami taamatut aaqqissuussisoqassasoq nipilersuuserluni.
