SIK aamma Royal Greenland kilisaatini inuttat pillugit isumaqatigiissuteqarput ukiunut pingasunut atuuttussamik. – Arlaleriarluta ullunilu arlalinni isumaqatigiinniartareerluta nutaamik isumaqatigiissuteqarpugut, SIK-mit isumaqatiginninniartitavut oqaluttuarput.
Kilisaatini inuttaasut sulinerannut naapertuuttumik akissarsiat tunngaviusut pitsanngoriaateqartinneqarnissaat isumaqatigiinniarnerni siunertarineqarsimavoq.
Taamaalilluni anguneqarpoq kilisaatini inuttat tamarmik akissarsiaasa ukiut pingasut ingerlaneranni ukiut tamaasa 12 procentinik qaffanneqartarnissaat. Imaappoq akissarsiat tunngaviusut katillugit 36 procentit missaannik ukiut taakkua ingerlaneranni qaffanneqassapput.
Inuttat 18-it sinnerlugit ukiullit tunngaviusumik akissarsiaasa ukiumut 11 procentinik qaffanneqartarnissaat isumaqatigiissutigineqarpoq. Imaappoq akissarsiat tunngaviusut katillugit 33 procentit missaannik ukiut taakkua ingerlaneranni qaffanneqassapput.
Sulisitsisup soraarnerussutisiassanut akiliutai 0,67 procentinik qaffanneqarput.
Danmarkimi akissarsianut sanilliullugit
Danmarkimi pisortani sulisut isumaqatigiissutaanni (OK24) nalagaaffimmi, kommunini regioninilu sulisut akissarsiaat 6,3 pct.-6,5 pct.-it missaannik qaffaateqarput ukiut marluk ingerlaneranni. Pisortani sulisut akissarsiaasa ukiumoortumik qaffakkiartornerat 3,0-3,5 pct.-it missaanniippoq.
Royal Greenlandimik isumaqatigiissummi qaffaatit ukiumut 11-12 procentiussammata angusat pisortani sulisut akissarsiaasa qaffaataannit annerussapput.
Bonusisiassat allannguuteqassanngillat
Bonusisiassat atuuttut allannguuteqartinneqanngillat. Isumaqatigiissummi nutaami allannguuteqaratik atuutiinnassapput, tassa tunngaviusumik akissarsiat qaffaataat sinaakkutit maanna atuuttut qaavisigut tunniunneqartassallutik.
SIK-p isumaqatiginninniartitaasa Royal Greenlandimik isumaqatigiissut nutaaq iluarisimaarpaat, isumaqatigiinniarnerit ullut arlerlugit ingerlanneqartut angusaqarfiulluartutut oqaatigalugit.
Asseq qulaaniittoq: Royal Greenlandip nittartagaanit tigusaq