Keermiaasiit: Sumut qanorlu ilusilimmik Nunarput ingerlanniarparput? Aalajangersaanerit imminnut assortuuttut niaqoqaratillu pamioqanngitsut.
Aalisakkanik tunisassiorneq
Maannakkut aalisakkanut raajanullu tunitsiveqarpugut sineriassuatsinni ikigisassaanngitsunik.
Soorngunami tunitsiviit ilai nutarterput, tassa atortorissaarutit eqqarsaatigalugit. Tamatumalu kingunerisaanik qaleruallit aalisakkallu tulaanneqartut ilaatigut sukkanerusumik suliarineqarsinnaanngornikuullutik.
Nunatsinni tunitsiviit raajaleriffiusinnaasut sisamaapput. Maannakkullu raajartassat eqqarsaatigalugit raajaleriffiit marluk ajornanngitsumik pisassiissutinit tamarmiusunit nunamut tulaatassarititaasut tunisassiassatut tamaasa suliarisinnaavaat, tassalu imaappoq allaat raajaleriffiit marluk matuneqarsinnaagaluarput malunnaateqanngitsumik.
Kingullertigut ilisimaneqartutuut Aasianni raajaleriffik tunisassiassaqarniarnermigut ajornartorsioqattaarpoq, raajat tulaanneqartartut killeqalermata. Qujanartumilli piffissaq kingulleq tunisassiorfimmik piginnittut qaleralittassat eqqarsaatigalugit tunineqalaarpoq. Taamaattoq ataavartumik tunisassiassaqaannarnissaa eqqarsaatigalugu iliuuseq naammanngilaq.
Una pivara, maannakkut qaleralittassanik tunineqartut oqariartorput aamma namminneq fabrikkiliorniarlutik, illua-tungaatigut Royal Greenland-ip fabrikkerujussua massakkut arfineq-marluinnarnik sulisoqartoq, tulaanneqartartut killeqarmata. Maannakkullu aamma assersuutigalugu ilaasortagut Ilulissani angerlartinneqaqattaalerput tulaanneqartartut killeqarmata.
Ataqatigiittoqanngilaq!
Aatsitassarsiorneq
Maannakkut kujataani aatsitassarsiornermik suliaqarniartut amerliartorput, aammalu aatsitassarsiorneq ingerlanneqareerluni.
Killavaanilu aammattaaq mannakkut aallartisartoqalerluni. Piumaguttalu aatsitassarsiorneq annertooq Narsaq-ip eqqaani ingerlanneqarsinnaagaluartoq ilisimavarput.
Taamaattumik aperisariqalerpunga: Nunarput ataatsimut isigalugu suniarpugut?
Nunarpununa ataqatigiissumik qanoq ingerlanniaripput?
Imaluunniit sattaserlutalusooq ingerlatsiniarsarivugut?
Jess G. Berthelsen, SIK-ip siulittaasua