Inatsisartunut qinerseqqammersimatsiarpugut, qineqqusaarnerullu nalaani qineqqusaartut pinngitsoqaratik neriorsueqattaarput maani nunami inuuniarneq oqinnerulissasoq.
Ilaatigullu qineqqusaarnermi neriorsuutit ingasangaartarmata allaat eqqarsarnarsisarluni aningaasat qilammit nakkaanersut.
Qineqqusaartut tamarmik neriorsueriarlutik inuuniarneq maani nunami oqinnerulissasoq, maannakkut killormorluinnaq pisoqalerpoq, tassami orsussaq 85 øremik ullumimiit qaffappoq.
Ulluinnarni inuuniarneq sutigut tamatigut oqimaannerulissaaq ajornakusoornerulissaarlu, orsussarmi qaffakkaangat sunut tamanut tuniluuttarpoq, suullu tamarmik qaffakkaluttuinalersarlutik, tassami nioqqutissanut, ineqarnermut, allanullu akinut pinngitsoorani tuniluuttussaavoq.
Isumaqarpunga qinersisartunut salloqittaanerusoq. Inatsisartunut maannakkut isertut qineqqusaaramik pinngitsoqanngingajallutik neriorsueriarlutik inuuniarneq maani nunami oqinnerulissasoq, maannakkut killormorluinnaq pisoqalerpoq.
Taamaammat Inatsisartut immikkut aningaasaliisariaqarput orsussamut akit nikinnginnissaannut.
Aamma tupigaara maannakkut Polar Oil qaffaasoq, tassami nunarsuarmimi orsussamut akit qaffakkiartunngimmata.
Jess G. Berthelsen
Kattuffiup siulittaasua