Gertrud Egede Jensenip siulittaasutut tunuarnerata kingorna Qaqortumi sulisartut peqatigiiffiat QSIP Sinniisoq immikkut ittumik ataatsimeersuarpoq ulloq 8. oktobari 2025, taamalu siulittaasortaarlunilu siulersuisortaarpoq.
Qulaani assimiipput siulersuisunngortut sinniisullu ilaat: Siulittaasoq Dorthinnguaq Brønlund (assimi talerperliup tullia), siulittaasup tullia Helga Ottosen, allatsi Kelly Berthelsen kiisalu siulersuisunut ilaasortat Arne Møller aamma Karen Kristiansen.
Peqatigiiffiup ukiorpassuarni siulittaasorisimasaa Jacob G-Motzfeldt ukioq manna toqusoq minutsimi ataatsimi nipaallisimanikkut eqqaaniarneqarpoq.
Maanna sulisartut peqatigiiffiattut sukataarluni ingerlaqqinnissaq siunniunneqarpoq. Tassami QSIP Sinniisoq nunatsinni sulisartoqarnermi aqqutissiueqqaartunut ilaavoq peqatigiiffittut siullersaagami. Ulloq 25. januaari 2026 peqatigiiffiup ukiunik 80-iliilluni ullorsiornissaa qilanaarutigineqarpoq.