SIK-p Inuusuttaasa ataatsimeersuarnerannit



SIK-p Inuusuttaasa 2021-mi ataatsimeersuarneranni peqataasut, saamerlermiit: Sara M. Heinrich, Qaqortoq, Thrune Johansen, Ilulissat, Karen Thorleifsen, Aasiaat, Holga Olsen, Aasiaat, Asasaq Gedionsen, Nanortalik, Peter B. Mølgaard, Ilulissat, Føbe Davidsen, Qaqortoq, Jørgen Vetterlain, Ilulissat, Aqqaluk Karlsen, Qeqertaq, Paula L. Petersen, Qasigiannguit, Naduk A. Qaavigaq, Qaanaaq, Inge Q. Alataq, Qaanaaq, Monika Svendsen, Aasiaat, Jakobine Uitsatikitseq, Tasiilaq, aamma Ane-Marie Havmøller-Jørgensen, Upernavik.

SIK-p inuusuttai attaveqaatiminnut ilaasortaminnullu ataatsimeersuartitsivoq pikkorissarnertalimmik. Pikkorissarnemi sammineqartut ukuupput: Malittarisassanut pikkorissarneq, SIK-p isumaqatigiissutaanik pikkorissarneq aammalu sassarsinnaanermut pikkorissarneq. Tassani siunertarineqarpoq inuusuttut ataatsimeersuariartut malittarisassatigut isumaqatigiissutitigullu sassarsinnaanikkullu eqaannerusumik suleriuse­qa­lernissaat.

Ulloq 5. oktobari 2021 SIK-p Inuusuttai ataatsimeersuarput, tassanilu oqaluuserisassatut siunnersuutigine­qarsimasut peqataasunit oqallisigineqarluarlutik, soorlu assersuutigalugu Kalaallit Nunaanni ilinniarsimasut oqaatsit atorsinnaasaasa killeqarnerat pillugu suliffinni atorfissaqartinneqanngitsutut inissinneqartarnerat.

Ataatsimeersuarneq naggaserlugu qinersinermi ima inissitsitertoqarpoq: Siulittaasoq Peter B. Mølgaard, Ilulissat, siulittaasup tullia Ane-Marie Havmøller-Jørgensen, Upernavik, siulersuisunut ilaasortaq Føbe Davidsen, Qaqortoq, siulersuisunut ilaasortaq Thrune Johansen, Ilulissat, aamma siulersuisunut ilaasortaq Jakobine Uitsatikitseq, Tasiilaq.

Qinigaaffimmi uani SIK-p Inuusuttaani siulersuisunngortut makku anguniassallugit aalajangiusimavaat: Siullertut inuusuttut siunnersuisoqatigiiffiat Sorlak qanimut suleqatigillualerniassallugu aappaattullu kalaallisut oqaatsitta pingaartinneqarnerulernissaanik nipilioqataanerulernissaq. Kisiannili SIK inuusuttaasa siunertai annerusumik suliniuteqarfigineqaqqissapput.

SIK-p Inuusuttai pillugit paasissutissat tamalaat – una tooruk


Ukiuni tulliuttuni marlunni SIK-p Inuusuttaani siulersuisuusussat, saamerlermit: Thrune Johansen, Føbe Davidsen, Peter B. Mølgaard (siulittaasoq), Ane-Marie Havmøller-Jørgensen (siulittaasup tullia) aamma Jakobine Uitsatikitseq.