Sulisunik allamiunik atornerluisarneq pillugu SIK-p eqqartuussisulersuussisitsiniarnera tusagassiuutitigut sammineqalerpoq (AG 17. juuli 2024-meersoq).
Allaaserisami qulequtaqartumi ”Eqqartuussisulersuussinissaq pisariaqaleraangat” upernaaq apriilip naalernerani SIK-p nittartagaatigut saqqummiunneqartumi oqaluttuarineqarpoq Nuummi sulisitsisup sulisuminik nunanit allaneersunik atornerluerujussuarsimanera SIK-p advokatiata suliassatut ingerlatilersimagaa.
Maannalu SIK-p suliffeqarfik pineqartoq, RS Services, eqqartuussisunut suliassanngortippaa. Aviisimi AG-mi tamanna sammineqarpoq tunngaviusut nassuiarneqarlutik allaaserisamilu pingaarnermi isummersorfigineqarlutik. Sulisartunillu nunanit allaneersunik sulitsitsut taamatut atornerluisarnerat aviisimi allaaserisami pingaarnermi alianartutut taaneqarpoq.
Soorlu sulisut ukiuni arlalinni sulinngiffeqartinneqarsimanngillat. Aamma nalunaaquttap-akunnerpassuini qaangiuttoortarsimapput tamatumunnga akissarsisinneqannguaratik. Taamatuttaarlu sapaatip-akunneranut døgnimik ataatsimik qasuersaarfeqartitsinissaq qaammaterpassuarni atorneqarsimanngilaq.
SIK-p allattoqarfiani pisortaq Bjarne Petersen AG-mut oqaluttuarpoq sulisartut allamiut amerlanerujartuinnartut SIK-mut saaffiginnittalersimasut sulinermi atugarisaminni naapertuilluanngitsuni ikiortissarsiorlutik.
”Sulisitsisut amerlanerpaartaat sulisuminnik allamiuusunik ajunngitsumik pinnittartut isumaqarpunga, ajoraluartumilli arlalitsigut paasisimavarput ilaat sulisuminnik atornerluisartut – taamaattoqaraangallu sapinngisatsinnik ikiuunniartarpugut,” Bjarne Petersen oqarpoq.
AG-mi allaaserisamik pingaarnermik allattoq isumaqarpoq tamanna iliuuseqarfigineqartariaqartoq.
”Sulinermi atugassarititat naammaginanngitsut ajoraluartumik ilimagisamit annertunerusut inuiaqatigiittut erseqqissumik killilertariaqarpavut,” allaaserisami pingaarnermi taama allassimasoqarpoq. Aviisi isumaqarpoq suliffeqarfiit inatsisit maleruagassallu malinneraat qulakkeerniarlugu nakkutilliinerit sukannernerit akulikinnerusullu pisariaqartinneqartut.