Skip to content

2024-mi akiliutitilluni sulinngiffeqarluni angalanissamut qinnuteqarit

Naluneqanngitsutut SIK-p Sulinngiffeqarluni Angalanermut Aningaasaateqarfia (feriefondimik taaginnartagarput) angalanernik immikkoortunik marlunnik ingerlatsilersussaavoq: 1) Makitsinikkut angalanerit ukiorpassuanngortuni nalunngisavut, aamma 2) Feriefondimit akiliutitilluni ukioq allortarlugu angalanerit sulisoqatigiiaanut aalajangersimasunut 1. apriili 2024-mit atuutilersussat. SIK-p allattoqarfia angalanerit nutaassat pillugit ilisimatitsissummik imaattumik allagaqaqqammerpoq:

SIK-p isumaqatigiissutai malillugit sulisuusut ilarpassui 2024-mi akiliutitillutik sulinngiffeqarlutik angalanissaminnut decembarip aallaqqaataanit qinnuteqarsinnaalissapput. Tassani pineqarput sulinermik inuussutissarsiuteqartut ilaat uku SIK-p sulissutiginninneratigut ukioq allortarlugu akiliutitillutik angalanissamut pisinnaatitaalersut:

    • Niuernermi allaffinnilu sulisut (HK-t) Namminersorlutik Oqartussani, kommunini naalagaaffiullu suliffeqarfiini sulisut

    • Meeqqerisut isumaginninnermilu ikiortit socialmedhjælperit socialhjælpe­rillu

    • Peqqinnissamut ikiortit

    • Oqalutsit nutserisullu

Sulisunut taakkununnga ilaaguit illit ilaquttatillu ukioq allortarlugu sulinngiffeqarluni angalanissamut akiliunneqarnissamut pisinnaatitaavusi tamatumunnga piumasaasut naammassisimagukkit – siusinnerpaamilli 1. apriili 2024-mit taamatut angalasinnaalissallutit. Taavalu isumaqatigiissutitigut pisinnaatitaaffiit tamanna atorusukkukku qinnuteqarnermi immersugassaq aalajangersimasoq nittartakkakkoortoq immersussavat. Immersugassaq taanna SIK-p nittartagaani decembarimi ammarneqassaaq.

Angalanissamut taamatut qinnuteqarnermi uppernarsaatissat uku ilanngunneqassapput

    • Akissarsiat allagartaat kingulleq.

    • Inoqutigiit najugaqarnermut uppernarsaataat.

    • Atorfinitsitaanermi isumaqatigiissut.

Periarfissaq tamanna pillugu amerlanerusunik SIK-p nittartagaatigut paasisaqarsinnaavutit, angalanerit taamaattut pillugit maleruagassat tassani allattoqqissaarneqarsimammata. Paasissutissani matuma ataaniittuni maleruagassat tamakkua ilaat eqqartorneqarput. 

Apeqqutissaqaruit SIK-mut saaffiginnigit, telefoni 32 21 33-mut – imaluunniit toqqaannartumik 34 93 17-mut.

Feriefondimit ukioq allortarlugu angalasarnissat pillugit paasissutissat

  1. Feriefondi angalanissanut aninngaasaliisarpoq pisortat suliffeqarfiutaanni atorfininnermit sivikinnerpaamik ukiuni marlunni ataannartumik tamatumunnga katersisimagaanni. Ukiut katersiffiusut marluusut iluanni pisortani atorfimmut allamut nuunnermi sap. ak. 6 tikillugit katersinngitsoorsimagaanni taman­na qaqugu aningalanissamut akiliunneqarnissap naatsor­sorneranut sunniuteqassanngilaq.
  2. 2024-mi angalanissamut akiliunneqarnissamik qinnuteqarneq SIK-p allattoqarfianut siusinnerpaamik 1. decembari 2023 pisinnaavoq. Qinnuteqaat tiguneqarsimassaaq angalanissaq kissaatigisaq kingusinnerpaamik qaammatinik pingasunik sioqqullugu.
  3. Qinnutigineqarsinnaavoq Københavnimut utimullu angalanissaq økonomiklassemi (akikinneq allanngortinneqarsinnaanngitsoq). Bilitsimut akisunermut qaffatsitsiniaraanni akisunerussutaalersoq nammineq akiligassaassaaq. Angalanernik aaqqissuussinerit pissutigalugit aqqutaani unnuinissaq pisariaqassappat tamanna Feriefondip akilissavaa.
  4. Kalaallit Nunaanni angalanissaq aammattaaq qinnutigineqarsinnaavoq. Bilitsi akikinneq allanngortinneqarsinnaanngitsoq Feriefondip tamakkiisumik akilissavaa, Kalaallit Nunaata ilaanut sumulluunniit. Angalanernik aaqqissuussinerit pissutigalugit aqqutaani unnuinissaq pisariaqassappat tamanna Feriefondip akilissavaa.
  5. Timmisartumut bilitsimik inniminniinermut ilagitillugu angalanissaraluamik taamaatitsinermut sillimmasiissummik inniminniisoqassaaq.
  6. Ukioq allortarlugu angalanermi peqataasinnaapputtaaq aapparisaq ima­luunniit inoo­qa­ti­gi­saq – kiisalu qinnuteqartup qitornai imaluunniit aapparisap/inooqa­ti­gi­sap qitornai ul­lormi aallarfissami 18-inik ukioqalersimassanngitsut, akiliunneqarluni angala­sinnaatitaa­sup inoqutaanut ilaagunik. Inooqatigisaq inunnik nalunaarsuiffik naapertorlugu najugarisami sivikinnerpaamik ukiumi ataatsimi najugaqatigisimasariaqarpoq akiliunneqarluni angalanissamut peqataasinnaassaguni.
  7. Qitornavissiat 18-it inorlugit ukiullit meeqqallu 18-it inorlugit ukiullit allakkatigut akuerisaasumik paaqqutaralugit najugaqatigisat taamatuttaaq akiliunneqarluni angalanissamut peqataasinnaapput.
  8. Ilaqutariit ataatsimoorlutik angalassapput. Qitornarli atuariartortussaq Københavnimut anga­laqatigineqarsinnaavoq siumuinnaq bilitseqartillugu. Taassuma angerlarnissaa nammineq akiligassaavoq.
  9. Piffissap katersiffiusup nalaani sulisoq aapparisami imaluunniit sivikinnerpaamik ukiumi ataatsimi najugaqatigalugu inooqatigisami SIK-p feriefondianit imaluunniit feriefondimit allamit akiliunne­qar­luni ima­luun­niit SIK-p feriefondianit makitaalluni angalasinnaanera atorlugu angalaqataappat, taassuma SIK-p feriefondianit angalanissamut akiliunneqarsinnaatitaanera atorunnaassaaq, apeqqutaa­nani aapparisaa/inooqatigisaa pisortani imaluunniit namminersortuni sulisuunersoq.