Ukiuni qulingiluani ataannartumik siulittaasooreerluni, ukiunilu siuliini siulersuisunut ilaasortaasareerluni, Ulrik Lyberth aalajangersimavoq Kangaamiuni sulisartut peqatigiiffianni siulittaasuunini ukiup matuma naaneranut killeqassasoq.
Aammamigooq soraarninngulerami. Ukiut 51-t sulereersimalerluni (piffissaq ilinniartuuffigisaq ilanngullugu) novembarip naanerani soraarninngornissani qilanaareqaa, suliarisinnaasaraluani piffissaaleqiffigisartakkanili aallussinnaalersussaagamigit – ”suliaarunnavianngilangami!”
Aamma sulisartut peqatigiiffeqarneranni pisariaqartinneqaraangami ikiuuttarumaarnerarpoq.
Asseq qulleq aasaq manna juunip naanerani SIK-p Nakkutilliisoqarfiata ataatsimiinnerata naaneranit pisuuvoq – Ulriup Nakkutilliisoqarfiup ataatsimiinnerani kingullermik peqataanera ilisimatitsissutigalugu SIK-p siulittaasuata Jess G. Berthelsenip qutsavigimmagu tammajuitsussaanillu tunillugu.
Sanasoq kiassaatilerisorlu
Ulrik Lyberth inunngorpoq Kangaamiuni ulloq 14. maaji 1959. Ukioq 1975-imi maajip aallaqqaataani sanasussatut ilinniartunngorpoq, soraarummeerporlu Danmarkimi Thisted Teknisk Skolemi 1978-imi septembarip 26-ani, ilinniarfimmi tassani kalaallini sanasuni siullersaalluni.
Sanasutut ilinniakkami saniatigut kiassaatilerinermik ilinniarpoq, varmemesteritut aamma oliefyrmontøritut.
”Tamanna suliffinni iluaqutigeqaara, aammami nunaqqatitsinni iluaqutigineqarpoq pingaartumik ukiuunerani kiassarnerup tungaatigut ikiortariaqalersoqartaannarami,” Ulrik oqaluttuarpoq.
Ulrik 1986-imit 2002-p tungaanut sanaartornermi sanasutut namminersortutut ingerlatseqataavoq. 2003-milu aggustimit manna tikillugu kommunimi sulivoq utoqqaat illuanni meeqqerivimmilu pedelitut.
Sulinermi atugassarititaasut akuutitsinerlu
Sulisartut peqatigiiffiannik ukioq manna ukiunik 65-iliisumik ingerlatseqataanermini Ulrik Lyberthip pingaartitaraa ilaasortat ataasiakkaat sulinerminni atugassarititaasunik aamma imminnut tunngassuteqartunik eqqumaffiginninnissaat – tassa isumaqatigiissutinik atuttunik imarisaannillu ilisimasaqartariaqarlutik, isumaqatigiissutit ulluinnarni sulinitsinni ”paarsisuummata”.
Ilaasortanut suliffinnullu attaveqarluarniarneq ilaatigut uuttuutigalugit Kangaamiuni sulisartut peqatigiiffiat 2023-mi SIK-p iluani ”Peqatigiiffitsialattut” toqqagaavoq.
”Kangaamiuni sulisartut peqatigiiffiattut ingerlarsortorsuunngikkaluarluta taamatut ukiut ingerlaneranni maluginiarneqarsimanerput qujalluta tulluusimaarlutalu tigusimavarput,” Ulrik Lyberth oqarpoq, nangillunilu:
”Taasariaqartoq aamma tassaavoq sulisartut peqatigiiffianni siulersuisuni pingaartitarigatsigu ilaasortanik katerisimaartitsinermi nunaqarfimmiunik akuutitsisarnissaq, unnussiorneruppata allatulluunniit ataatsimoorussamik nunaqarfimmiut aaqqissugarippatigit. Tamakku nunaqqataasunit nuannaarutissarsiffigineqartarput, taamaalillutami nunaqarfipput uumassuseqalersittaratsigu.”
Akaareqatigiinneq nukittunerulersitsisarpoq
Sulisartut peqatigiiffiat nukittuumik ingerlassappat suut pisariaqarnersut apeqqutigineqarmat Ulrik Lyberth ima akivoq:
”Sulisartut peqatigiiffianni nukittuumik ingerlassagutta pisariaq arpoq siulersuisuni suleqatigiinnermi pissaaneqarniunnermik ingerlatsisoqannginnissaa. Sulineq akaareqatigiilluta ingerlatissavarput, inuttullu ataasiakkaatut isummersimagutta ajugaanissaq kisiat siunertarissanngilarput, immitsinnut sapersissanngikkutta. Sulinitsinni isumaqatigiissimatilluta sulinerput nukittunerusarpoq.”
Imalu naggasiivoq:
”Ukiuni qaangiuttuni peqatigiiffipput sinnerlugu SIK-p SISA-llu ataatsimoortitsisarnerini peqataasarsimanikka nuannersut maannamullu ikinngutigilersimasakka nuannersorpassuarnut qujassuteqaatigissallugit pinngitsoorusunngilanga, siunissamilu sulisartut pillugit sulilluarnissaannik kissaappakka.”