SIK-p allattoqarfianit paasissutissiineq: SIK pisortanilu sulisitsisut (Namminersorlutik Oqartussat kommunillu) sivitsortumik isumaqatigiinniartareersullu 13. septembari 2022 Namminersorlutik Oqartussat isumaqatigiissutinut immikkoortortaqarfiannit tusagassiorfinnut nalunaarut SIK-p nittartagaatigut saqqummiupparput. Tassani ilisimatitsissutigineqarpoq isumaqatigiinniarnerit naammassisimasut – tassa tunngaviusunik paasissutissiineq siulleq.
Tusagassiorfinnut nalunaarummi pitsanngoriaatit angusallu nutaat sisamanut immikkoortillugit naatsumik oqaluttuarineqarput, tassa taakku isumaqatigiissutini assigiinngitsuni 18-ini 2022-mit 2026-imut atuuttussani allassimalersussat.
Allakkiap matuma allanneqarnerata nalaani isumaqatigiissutit ataasiakkaat SIK-mi suli tigunngilavut. Namminersorlutik Oqartussani suli suliarineqarput allaqqissaarneqarlutillu. Nalunngilarpullu tamanna aamma sivisusinnaasartoq.
Isumaqatigiissutilli allaqqissaakkat nutseriikkallu tiguniariarlugit nittartakkatsinnut iliorarumaarpavut quppernermi ”Isumaqatigiissutit”-ni. Matumanili tusagassiorfinnut nalunaarut septembarimeersoq malittareqqilaassavarput paasissutissanik erseqqinnerusunik ilallugu.
Akissarsiat novembarip naanerani iluarsineqassapput
Pitsaanerulersitsinerit ataatsimut katillugit 128,2 mio kr.-nut naatsorsorneqarsimapput. Tassa SIK-p isumaqatigiissutai malillugit sulisuusut akissarsiaat ataatsimut 8 procentinik qaffassapput.
Ulloq 8. novembari 2022 SIK-mi peqatigiiffinnut attaveqaatinullu tamanut kiisalu sulisut sinniisaannut e-mailikkut ilisimatitsissutigineqarpoq novembarip naanerani akissarsisitsinernut atatillugu akissarsiat kingumoortumik 1. apriili 2022-mit iluarsineqarumaartut.
Ilisimatitsissut tamanna aammattaaq SIK-p nittartagaatigut Facebookiatigullu tusarliunneqarpoq.
Naartunermi akissarsiaqartussaatitaaneq
Ernereernerup kingorna meeqqamut ataatsimut sap. ak. 40-t tungaannut tamakkiisumik akissarsiaqarsinnaalernissaq Ilaqutariit arnallu atugarisaannut pitsanngorsaataaniartussaavoq (meeqqanut marlunnut amerlanerusunullu tunngatillugu sap. ak. 48-t tungaannut) – piffissanilu taakkunani soraarnerussutisiassanik katersuisoqartassaaq.
Maannamut arnat SIK-p isumaqatigiissutai naapertorlugit sulisuusut sap. ak. 18-it ernereernerup kingorna sulinngiffeqarnerminnut akissarsiaqariarlutik tamatuma kingorna ullormusiaqartussanngortarsimapput.
Ernereernermi tamakkiisumik akissarsiaqarsinnaatitaalernikkut pingaartumik arnat SIK-p isumaqatigiissutai malillugit sulisuusut isertitaqarnermikkut malunnaatilimmik pitsanngorsaavigineqassapput.
Isumaqatigiissutitigulli aalajangersagaq taanna ajoqit pattattullu kiisalu qatserisartut isumaqatigiissutaanni ilaassanngilaq.
Sulinngiffeqarluni angalanernut akiliunneqarsinnaalersussat
Isumaqatigiissutit assigiinngitsut sisamat tunngavigalugit sulisuusut ilaqutaallu ukioq allor-tarlugu sulinngiffeqarlutik angalanissaminnut akiliunneqarsinnaalissapput. Tamanna malunnaatilimmik angusaqaataavoq, SIK-p Sulinngiffeqarluni Angalanermut Aningaasaateqarfianik aaqqissuussinermik, kattuffiup ilungersuuteqarneratigut qanga pilersinneqarsimasumik, ineriartortitseqqinnerusussaq.
Sulisut qaammammusiallit akiliunneqarlutik feeriarsinnaalersussat ukuupput:
- HK-t (niuernermi allaffinnilu sulisut).
- Meeqqerisut isumaginninnermilu ikiortit socialmedhjælperit socialhjælperillu.
- Peqqinnissamut ikiortit.
- Oqalutsit/nutserisut.
Ukioq allortarlugu taamatut akiliunneqarluni sulinngiffeqarluni angalasinnaatitaalernissaq feriefondimut pioreersumut ilassutitut isumaqatigiissusiarineqartussaavoq.
Taamaalilluni SIK-p Sulinngiffeqarluni Angalanermut Aningaasaateqarfia aaqqissuussinernik marlunnik immikkoortoqartussanngorpoq: Siulleq tassa qinnuteqartunik makitsisarnermik aaqqissuussineq maannamut atuuttoq, aappaalu tassa sulisut qulaani taaneqartut akiliunneqartarnissaannik aaqqissuussineq atuutilersussaq.
SIK-p isumaqatigiissutai malillugit sulisuusut inoqutaasalu akiliunneqarlutik angalasinnaanerannut tunngasoq nutaaq alla tassaavoq atorfinitsitaanermi angalanermut akiliunneqarsimagaanni aamma soraarnermi angalanermut akiliunneqarsinnaalerneq.
Qanigisap perululluni napparsimanerani sulinngikkallarsinnaaneq
Qanigisap perululluni napparsimanerani aamma/imaluunniit toqunerani akissarsiaqaannarluni sulinngikkallarsinnaaneq akiliunneqarlunilu angalasinnaaneq siusinnerungaatsiartukkut pisinnaalerpoq. Maannamut tamanna ukiumi ataatsimi sulereernermi pisinnaatitaaffiulertarpoq. Isumaqatigiissutinili nutaassani tamanna allanngortinneqassaaq qaammatini pingasuni sulereernermi pisinnaanngorlugu.
Ilinniarsimasut innuttaasunillu qanimut sullissisut immikkut maluginiarlugit
Isumaqatigiissutit nutarterneqarneranni SIK-p isumaqatigiissutai malillugit sulisuusut tamarmik tunngaviusumik akissarsiaasigut pitsanngorsaavigineqarput.
Isumaqatigiinniarnernili illuatungeriit inunnut qanimut sullissisunik ilinniarsimasunillu immikkut ukkataqarusussimapput, taakku akissarsiatigut malunnarnerusumik takussutissikkusullugit. Taakku soorlu tassaapput:
- Nunaqarfinni peqqinnissaqarfimmi sulisut.
- Isumaginninnermi ikiortit.
- Plejemuut.
- Terminalini sulisut.
Utoqqalinissamut katersaqarnerunissaq
Soraarnerussutisiassanik katersaqarnermi procentit tunngaviusut tamanut atuuttumik qaffaavigineqarput. Siullermik isumaqatigiissutigineqarsimagaluarpoq – soorlumi tamanna septembarimi tusagassiorfinnut nalunaarummi taaneqartoq – tapisiat assigiinngitsut amerlanerusut soraarnerussutiassaqaataalissasut. Tamannali akissarsialersuinermi suleriaatsikkut pisariuallaassaqimmat kingusinnerusukkut isumaqatigiissutigineqarpoq tamanut atuuttumik qaffaasoqaannassasoq.
Soraarnerussutisiassanik katersinermi akiliutit procentilersuutaat taamaalilluni qaffanneqarput 11,5 procentinit 11,66 procentinut.
Piginnaasanik qaffassaaneq
SIK-p pisortallu isumaqatigiinniarneranni aammattaaq siunertaq imaattoq isumaqatigiissutigineqarpoq:
”Piginnaasat. Piginnaasat qaffassarneqarnissaannut periarfissat qulakkeerneqassasut illua’tungeriit isumaqatigiissutigaat, taamaalillutik ilinniagaqarsimanngitsut amerlanerit ilinniagaqarsimasutut atorfeqalerniassammata aamma/imaluunniit akissarsiaminnut naleqquttunik tapeqartinneqalerlutik”.
Allatut oqaatigalugu piginnaasat qaffassarnissaannut kajumissaarisoqassaaq, taamalu ilisimasat piginnaasallu sulinikkut pigilersimasat (realkompetence) ineriartorteqqinneqarlutillu pappialakkut isertitatigullu malugusuutigineqarsinnaalertariaqarlutik.
Isumaqatigiissutit ataasiakkaat Namminersorlutik Oqartussanit tigoriarutsigit SIK-p allattoqarfianit iliuuseqarumaarpugut pisoqqanut sanilliullugit nutaartaat suunersut kattuffimmi peqatigiiffinnut sulisullu sinniisaannut ilisimatitsilluta.