Illit ilaquttatillu 2025-mi angalanissanik makitsinermut ilaatinneqarusukkussi ukioq manna aasaanerani qinnuteqarnissarsi eqqaamasariaqassavarsi. Tamanna pissaaq qinnuteqarnermi immersugassamik SIK-p nittartagaani 15. juunimit 1. septembarimut ammatinneqartussamik immersuinikkut.
Tamanna periarfissaavoq SIK-p isumaqatigiissutai malillugit sulisuusut ilarpassuinut, suliffeqarfinni SIK-p Sulinngiffeqarluni Angalanermut Aningaasaateqarfianut (feriefondimut) akiliuteqartartuni sulisuusunut.
Malugiulli makitsinikkut angalanerit atuutinngimmata sulisunut aalajangersimasunut ukioq allortarlugu akiliunneqarlutik sulinngiffeqarlutik angalasinnaalersimasunut – ukununnga: 1) Niuernermi allaffinnilu sulisut (HK-t) Namminersorlutik Oqartussani, kommunini naalagaaffiullu suliffeqarfiini sulisut, 2) meeqqerisut isumaginninnermilu ikiortit socialmedhjælperit socialhjælperillu, 3) peqqinnissamut ikiortit aamma ikorfartortit, kiisalu 4) oqalutsit nutserisullu. Taakku makitsinikkut angalanernik qinnuteqarsinnaanngillat.
Feriefondip aaqqissuussineri assigiinngitsut arlariit taakku pillugit paasissutissat atuarumallugit una tooruk.
Makitsinikkut angalanissanik aaqqissuussineq pillugu paasissutissat pineqarsinnaareerput, tassa sutigut akiliussisoqarsinnaanersoq aammalu makitsinermi peqataatinneqassagaanni piumasaqaatit eqqortinneqarsimasussat suunersut. Paasissutissat taakkorpiaat atuarumallugit una tooruk.
Qinnuteqaammik immersuilersinnani piumasaqaatit taakkua ilisimanissaat pingaaruteqarpoq – nammineq ugguannginnissaq pillugu, aammali qinnuteqaatinik SIK-p allattoqarfiani tamakkuninnga misissuilluni immikkoortiterillunilu suliaqartartup oqilisaatilaarnissaa pillugu.
Taamaattumik aamma sulisartut peqatigiiffiini ingerlatsisuusut sulisullu sinniisaat feriefondip angalatitsisarneri pillugit aperineqarajummata SIK-mit kajumissaarusuppavut tamakku pillugit paasissutissanik atuarluaqqullugit.
