Ukiumoortumik nalunaarusiaq iliuusiuvoq nutaaq SIK-p allattoqarfiani ukiup ingerlanerani sunik ingerlataqartoqarsimaneranik takussutissiisussaq.
“Ukiumoortumik nalunaarusiaq 2020” 34-nik quppernilik (kalaallisut qallunaatullu) e-mailikkut nassiussuunneqaqqammerpoq. Taamatut paasissutissinniarlugit saaffigineqartut tassaanerupput kattuffiup ilaasortai, siulersuisuunerit, immikkoortortaqarfiit aamma sulisut sinniisorpassui.
Taamatut nalunaarusiornikkut SIK-p allattoqarfia paasissutissiiniarpoq ukiup ingerlanerani suliat tamalaat qanoq ittut ingerlanneqarsimanerannik.
“Soorunami siunertaraarput kattuffiup ilaasortaanik sullissilluarnissarput soqutigisaannillu isumaginnilluarnissarput. Taamalu aamma pisortani namminersortunilu sulisitsisunut attaveqarnitsinni SIK-p isumaqatiginiartakkatut suleqatissatullu tutsuiginartumik imminut takutittarnissaa pingaartilluinnarparput,” allattoqarfiup pisortaa Bjarne Petersen nalunaarusiamut siulequtsiussamini taama allappoq.