SIK-mi peqatigiiffinnut sulisullu sinniisaannut ilisimatitsissut: Coronamik tunillatsissimallutit angerlarsimasariaqaruit imaluunniit meeraq coronamik tunillatsissimasoq paaralugu angerlarsimasariaqaruit, taamalu suliffeerunnermi ikiorsiissutinik imaluunniit pisortanit ikiorsiissutinik qinnuteqarniarlutit, nakorsamit allagartamik uppernarsaammik piniartariaqanngilatit.
Taamatut uppernarsaateqarnissamik piumasaqarunnaarallarneq qaammatini marlunni atuutissaaq.
Allagaq januaarip 17-iani Namminersorlutik Oqartussanit ilisimatitsissutitut kommuninut nassiunneqarsimasoq taama imaqarpoq.
Allakkami imaaliinnarlugu paasineqarsinnaanngikkaluarpoq corona pissutigalugu sulinngitsoortut kikkut pineqarnersut. Kisianni SIK-mit paasiniaasoqarneratigut erseqqissarneqarpoq tamatumani pineqartut ukuinnaanngitsut namminneq coronamik tunillatsissimallutik sulinngitsoortariaqartut angerlarsimasariaqartullu, aammali pineqarlutik meeqqaminnik coronamik tunillatsissimasunik napparsimasoortut taamalu angerlarsimasariaqartut.
Nakorsamit uppernarsaatinik nalinginnaasumik piumasaqarnerup coronamut tunngatillugu taamatut qasukkarneqarallarnera pissuteqarpoq maanna tunillatsissimasut amerlasoorujussuanngorsimanerannik taamalu peqqinnissaqarfiup sulisussatigut malinnaasinnaajunnaaqqajaaneranik.
Isumaqatigiissutini allassimasut assigiinngitsut tunngavigalugit SIK-mit oqaatigisariaqarpoq meeqqap coronamik napparsimanerani ullut 12-it tikillugit akissarsiat pigiinnarlugit ataataq anaanarluunniit paarsiumalluni sulinngikkallarsinnaatitaammat.
► Una tooruk Namminersorlutik Oqartussanit allagaq pineqartoq aajumallugu