Piffissamut 2026-mit 2029-mut atuuttunik isumaqatigiissuteqarfigineqarput Maniitsoq Fish, Avannaa Seafood aamma Arctic Prime Fisheries.
Aalisakkerinermi suliffiit ilaat pingasut isumaqatigiissuteqarfigineqaqqipput. Tassaapput Arctic Prime Fisheries, Maniitsoq Fish aamma Avannaa Seafood. SIK-p allattoqarfiani suleqativut isumaqatigiinniarnernut peqataasut ima oqaluttuarput:
Arctic Prime Fisheries
Sivisuumik isumaqatigiinniartareerluta naammaginartilluakkatsinnik isumaqatigiissuteqarpugut.
Ukiunut pingasunut isumaqatigiissuteqarpugut. Sulisut tamarmik nalunaaquttap-akunnermusiaat ukiut tamaasa 4 kr.-inik qaffattassapput.
Sulisitsisup soraarnerussutisiassanut akiliutai 1,2 %-inik qaffassapput, katillugit 8,2 %-inngorlutik. Sulisullu soraarnerussutisiassanut katersugaat 3,5 %-iummata, soraarnerussutisiassanut katersukkat katillutik 11,7 %-inngorput.
Sulinngiffeqarluni angalanermut aningaasaateqarfik: Tassunga tapiissutit nalunaaquttap-akunneranut suliffiusumut 10 øremik qaffapput.
Sulisut tamarmik akissarsiaat ukiut pingasut ingerlaneranni agguaqatigiissillugit 11,16 %-inik qaffassapput. Tassa akissarsiat ukiumut 3,72 %-inik qaffattassapput. Tamannalu naammagisimaarparput aalisakkerinermut tunngatillugu suliassaqarfimmi unamminiarnartoqarsimanera eqqarsaatigissagaanni.
Danmarkimi akissarsiat qaffakkiartornerat agguaqatigiissillugu ukiumut 3,2 %-it 3,4 %-illu akornanniissimavoq (Danmarks Statistikkimit paasissutissat naapertorlugit). Taamaattumik isumaqarpugut isumaqatigiissut nutaaq ajoriinnagassaanngitsoq. Sulisummi akissarsiaat pisissutaasinnaanerulerput.
► Una tooruk Arctic Prime Fisheries-imut isumaqatigiissut nutaaq piumallugu
Maniitsoq Fish aamma Avannaa Seafood
Tassani pineqarput suliffeqarfiit marluk taakkuusunik piginnittullit – isumaqatigiissutillu imarisaat assigiipput.
Nalunaaqquttap-akunneranut akissarsiat qaffattassapput ukiumi siullermi 5 kr.-inik, ukiut aappaanni 4 kr.-inik ukiullu pingajuanni 3 kr.-inik.
Soraarnerussutisiassat 0,67 %-imik qaffassapput 1. apriili 2026-mit.
Nioqqutissiornermi sulisut (nalunaaqquttap-akunnermusiallit):
- Sulisut 18-it inorlugit ukiullit akissarsiaat agguaqatigiissillugit ukiumut qaffaateqarnerpaapput 5,55 %-inik (katillugit 16,65 %).
- Sulisut 18-it sinnerlugit ukiullit akissarsiaat agguaqatigiissillugit ukiumut qaffaateqarput 3,75 %-inik (katillugit 11,24 %).
Suleqatigiit siulersortaat (nalunaaqquttap-akunnermusiallit):
- Suleqatigiit siulersortaat 18-it inorlugit ukiullit akissarsiaat agguaqatigiissillugit ukiumut qaffaateqarput5,30 %-inik (katillugit 15,89 %).
- Suleqatigiit siulersortaat 18-it sinnerlugit ukiullit akissarsiaat agguaqatigiissillugit ukiumut qaffaatikinnerpaapput 3,39 % (katillugit 10,18 %).
Suliffeqarfinnut marluusunut angusat katillugit:
Suleqatigiiaat assigiinngitsut akissarsiaasa qaffaataat agguaqatigiissikkaanni ukiumut 4,50 %-iussapput, qaffaatit ukiunut pingasunut katikkaanni 13,49 %-iussallutik.
Kalaallit Nunaanni aningaasat nalikilliartornerat ineqarnermi aningaasartuutinut tunngatillugu 4,7 %-iuvoq, inuussutissanut tunngatillugu 3,7 %-iulluni. Naatsorsuutigineqarpoq aningaasat nalikilliartornerat piffissap isumaqatigiissuteqarfiusup matuma ingerlanerani 2,5 %-inut apparumaartoq. Tamanna uagut isumaqatigiissutilerisut iluarisorujussuuarput, tassami SIK-mut ilaasortat akissarsiaat pisissutaasinnaanerulissammata. Tassa akissarsiat pisissutaasinnaanerat ilorraap tungaanut ingerlavoq.
► Una tooruk Maniitsoq Fish-imut isumaqatigiissut nutaaq piumallugu
► Una tooruk Avannaa Seafood-imut isumaqatigiissut nutaaq piumallugu