Sulisut sinniisaasa ataatsimeeqatigineqarnerannit. SIK-p siulittaasua Jess G. Berthelsen uani saqqummiussivoq.
SIK-p siulersuisuuneri ukioq manna aappassaanik ataatsimeeqqammerput. Tamanna pivoq maajip 30-ani, pilersaarutaasutut Qaqortumi.
Sulisartut kattuffiata siulersuisuuneri sinerissami ataatsimiikkaangata ileqquulersimasutut tamanna iluatsillugu attaveqarfigisanik, innuttaasunik suliffeqarfinnillu oqaloqateqarnissamut periarfissarsiortoqarpoq.
Taamaalillutik siulersuisuunerit Qaqortup katersortarfitoqaani innuttaasunik ataatsimiisitsipput. Illoqarfimmi sulisut sinniisaat kiisalu sulisartut peqatigiiffianni siulersuisut ataatsimeeqatigineqarput. Suliffeqarfiit arlallit pulaarneqarput. Kiisalu nunaqarfiit Saarloq aamma Eqalugaarsuit orninneqarput aamma taakkunani innuttaasunik naapitsinissaq oqaloqateqarnissarlu siunertaralugit.
Qaqortumi katersortarfimmi innuttaasut ataatsimiisinneqarnerannit. Uani oqaaseqartoq tassaavoq siulittaasup tullia Jokum Zeeb.