Ukiumoortumik nalunaarusiaq SIK-p allattoqarfiani 2021-mi sunik ingerlataqartoqarsimaneranik takussutissiiniartussaq kattuffiup iluani susassaqartunut tamanut e-mailikkut nassiussuunneqaqqammerpoq.
Soorunami sammisat suliallu tamaviisa sukumiisumik allattorneqanngikkaluarput, taamatulli nalunaarusiornikkut paasissutissiiniarpugut kattuffiup allattoqarfiani ukiup ingerlanerani suliat tamalaat qanoq ittut ingerlanneqarsimanerannik.
Siunertaraarput kattuffiup ilaasortaanik sullissilluarnissarput soqutigisaannillu isumaginnilluarnissarput. Taamalu aamma pisortani namminersortunilu sulisitsisunut attaveqarnitsinni SIK-p isumaqatiginiartakkatut suleqatissatullu tutsuiginartumik imminut takutittarnissaa pingaartilluinnarparput.
Ukiumoortumik nalunaarusiamik matuminnga suliaqarnitsinni saaffigisavut tassaanerupput kattuffiup ilaasortai, siulersuisuunerit, peqatigiiffiit kattuffiup immikkoortortaqarfigisai aamma sulisut sinniisorpassui SIK-mut atasut. Aammali inuiaqatigiinni kikkunnulluunniit nunatsinni sulisartut kattuffiisa annersaat pillugu paasisaqarusuttunut allanut sammisipparput.
► Una tooruk “Ukiumoortumik nalunaarusiaq 2021 SIK” aajumallugu (quppernerit 34-t)